هەڵەیەک روویدا! دووبارە هەوڵبدە
رووداو دیجیتاڵ
یەدەگى گازى عێراق بۆ 132 ملیۆن مەتر سێجار بەرزبووەتەوە و حکومەتی عێراق 10 ملیار دۆلارى بۆ وەبەرهێنانی گازى هاوەڵ خەرج کردووە، کۆمپانیای کرێسێنت پێترۆڵیۆم داوا دەکات جیاوازى لە نێوان گرێبەستەکانى نەوت و گاز بکرێت.
رۆژی چوارشەممە 28ى کانوونى دووەمى 2026، کۆنگرەى عێراق بۆ وزە لە بەغدا ئەنجامدرا. محەممەد شیاع سوودانی، سەرۆکوەزیرانی عێراق لە گوتارێکدا لەو کۆنگرەیە رایگەیاند: ساڵی 2030 ساڵی گەیشتنە بەوەی 40%ی هەناردە نەوتییەکانی عێراق لە بەرهەمە نەوتییەکان بێت و هاوردەکردنی ئەو بەرهەمانە بەشێوەیەکی یەکجاری رادەگیرێت.
سەرۆکوەزیرانى عێراق رایگەیاند، یەدەگی گازی مسۆگەری عێراق بەرزبووەتەوە بۆ 132 ملیۆن مەتر سێجا، ئەوە جگە لەوەی تاوەکو ساڵی 2028 سووتانی گازی هاوەڵ بەتەواوی دەوەستێت.
عێراق رۆژانە پێویستى بە زیاتر لە 3.5 ملیۆن بەرمیل نەوتە هەناردەى بکات و دەشبێت گاز هاوردە بکات بۆ پڕکردنەوەى پێداویستى نێوخۆیی.
عیزەت سابیر، بریکاری وەزارەتی نەوت بۆ کاروباری گاز لە پانێڵێکى ئەو کۆنگرەیە رایگەیاند، بەرهەمی ساڵانەى گاز لەعێراق گەیشتووەتە یەک تریلیۆن و 140 ملیار پێ سێجا و یەدەگى ئێستاى گاز بەشی 100 بۆ 111 ساڵ دەکات.
ئێستا ئاستى وەبەرهێنانى گازى هاوەڵ لە کێڵگەکانى نەوت گەیشتووەتە 71%، لەکاتێکدا بەر لە چوار ساڵ رێژەکە 50% بووە.
بریکاری وەزارەتی نەوت بۆ کاروباری گاز رایگەیاند، حکومەتی عێراقی 10 ملیار دۆلاری خەرج کردووە بۆ کەمکردنەوەی رێژەی گازی هاوەڵ و داهاتى ئەو وەبەرهێنانەش بۆ 20 ساڵی داهاتوو دەگاتە 30 ملیار دۆلار.
یەکێک لەو پرسانەى گفتوگۆیان لەبارەیەوە کرا چوارچێوە یاساییەکانى گرێبەستەکانى نەوت و گازە لە عێراق.
عەبدوڵڵا قازی، بەڕێوەبەری جێبەجێکاری کۆمپانیای کرێسێنت پێترۆڵیۆم، جەختى لەوە کردەوە کە دەبێت بە تێڕوانینێکی جیاواز لە گرێبەستەکانى گاز بڕواندرێت بەراورد بە گرێبەستەکانى نەوت، ماوەى جێبەجێکردنى پڕۆژەیەکی گاز پێویستیی بە دوو بۆ سێ هێندەی پڕۆژەکانی نەوتە و تێچووەکەشى لەنێوان دوو بۆ 10 ئەوەندەیە.
بەشێک لە گەڕى پێنجەم و شەشەمى گرێبەستەکانى وەزارەتى نەوتى عێراق بۆ کەرتى گاز بوو کە لە سەردەمى حکومەتى ئێستاى عێراق کراوە.
بەڕێوەبەری جێبەجێکاری کۆمپانیای کرێسێنت پێترۆڵیۆم گوتى: "هاوتاکردنی گرێبەستەکانی پەرەپێدانی کێڵگەی نەوت و گاز ناڕاستە، دەبێت ئەو تێڕوانینە بگۆڕدرێت، لەگەڕی پێنجەم و شەشەمى گرێبەستەکان نرخی گاز بە 50%ی نرخی نەوت دیاریکراوە، ئەوە ستەمێکی گەورەی تێدایە بۆ وەبەرهێنانی کەرتی گاز کە سوودمەند نابێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ