هەڵەیەک روویدا! دووبارە هەوڵبدە
رووداو دیجیتاڵ
پاسەوانی پەرلەمانتارێکی عێراق لە بەسرە، تەقە بەسەر ژمارەیەک خۆپێشاندەری ئەو شارەدا دەکات و بە فەرمانى دادوەر دەستگیر دەکرێت.
رووداوەکە ئەمڕۆ یەکشەممە، 28ی ئەیلوولی 2025، لە بەردەم کۆمپانیای نەوتی ناوەڕاست لە بەسرە روویداوە. ڤیدیۆى کاتى تەقەکردنەکە لە تۆڕە کۆمەڵایەتییەکان بڵاوبووەتەوە کە دەری دەخات چەند کەسێک لە ئۆتۆمبێلێک دادەبەزن و یەکێکیان بە دەمانچەکەى تەقە بەسەر ژمارەیەک هاووڵاتیدا دەکات کە لە بەردەم ئەو فەرمانگەیەدا خۆپێشاندانیان دەکرد.
دواى رووداوەکە، فەرماندەیی پۆلیسی بەسرە روونکردنەوەیەکى لەو بارەیەوە بڵاوکردەوە و رایگەیاند، تەقەکەرەکە پاسەوانی پەرلەمانتارێکی عێراق بووە و بە دەمانچە تەقەی بەسەر خۆپێشاندەراندا کردووە، کاتێک لە بۆنەیەکی کۆمپانیای نەوتی ناوەڕاست بە یاوەریی ژمارەیەک پەرلەمانتار و کەسایەتی سیاسی و ئایینی چووەتە دەرەوە.
لە راگەیێنراوێکدا کە هەر ئەمڕۆ بڵاویکردەوە، فەرماندەیی پۆلیسی بەسرە رایگەیاند: بە فەرمانی دادوەر ئەو پاسەوانەی پەرلەمانتارەکە دەستگیرکراوە.
لیژنەی باڵای پارێزگای بەسرە لە راگەیێنراوێکدا گوتی: "بە تووندی سەرکۆنەی ئەو رووداوە نەخوازراوە دەکەین کە ئەمڕۆ روویدا و پاسەوانی یەکێک لە بەرپرسان تەقەی لە خۆپێشاندەران کرد و ئەو هەڵسوکەوتە یاساشکێنى بووە و پێشێلکارییەکی قبووڵ نەکراوە لە دژی مافی دەستووری هاووڵاتییان و رێگە بەوە نادەین کە پاساوی بۆ بهێنرێتەوە یان بەهەر پاساوێک بێت چاوپۆشی لێ بکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ