سووریا
وێنەیەکی ئەرشیڤی ساڵی 2017، کاتی گواستنەوەی چەکدارانی داعش لە قەلەموونەوە بۆ دێرەزوور بەپێی رێککەوتنێک
رووداو دیجیتاڵ
سەرچاوە خۆجێیەکانی سووریا دەڵێن، "لە بیابانی دێرەزوور، گرووپێک چەکدار هێرشیان کردووەتە سەر چەند کەسێک، کە خەریکی کۆکردنەوەی دۆمەڵان بوون و 18 کەسیان لێ کوشتن."
رۆژی چوارشەممە، 06-03-2024، سەرچاوە خۆجێیەکانی سووریا رایانگەیاند، "گرووپێک چەکدار کە گومان دەکرێت سەر بە داعش بن، هێرشیان کردووەتە سەر کۆمەڵە کەسێک لە کاتی کۆکردنەوەی دۆمەڵان لە بیابانێکی پارێزگەی دێرەزوور لە باکووری رۆژهەڵاتی سووریا و 18 کەسیان لێ کوشتوون."
ئەو سەرچاوە خۆجێییانە باس لەوەش دەکەن، "چوار لە کوژراوەکان چەکداری سەر بە حکومەتی سووریا [بەرگریی نیشتیمانی] بوون، 16 کەس بریندارن و 50 کەسیش بێسەروشوێنن."
بەگوێرەی ئەو سەرچاوانە، هێرشەکە لە بیابانی کەباجب بووە و لە ئەنجامی پێکدادانەکە 12 ئۆتۆمبێل سووتاون "دواتر هێزی پشتیوانی لەلایەن میلیشیای قودس و بەرگریی نیشتیمانییەوە نێردراونەتە ناوچەکە."
لە سەرەتای 2024ـەوە، هەروەک ئامارێکی ئەو سەرچاوانە پێشانی دەدات، لانیکەم 186 کەس لە 68 چالاکیی رووداوی هاوشێوەدا لەو ناوچەیە کوژراون، بەمشێوەیە:
- 24 هێرش لە بیابانی دێرەزوور کراون و 47 چەکداریان تێدا کوژراوە، کە 7 کەسیان سەر بە گرووپەکانی ئێران بوون، 5 چەکداری داعش و 17 کەسیشیان سڤیل بوون.
- 32 هێرش لە بیابانی حومس کراون و بوونەتە هۆی کوژرانی 50 چەکدار، 3 چەکداری سەر بە گرووپەکانی ئێران، 14 چەکداری داعش و 8 سڤیل.
- 6 هێرش لە بیابانی رەققە کە تێیدا 15 چەکدار کوژراون.
- 5 هێرش لە بیابانی حەما، 17 چەکدار و 7 سڤیل کوژراون.
- یەک هێرش لە بیابانی حەلەب کە تێیدا سێ چەکداری سەر بە گرووپەکانی ئێران کوژراون.
بەگوێرەی ئاماری بڵاوکراوەی ئەو سەرچاوە خۆجێییانە، "لە سەرەتای 2024ـەوە لانیکەم 32 منداڵ لە هێرشەکاندا کوژراون."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ