تۆم باراک لە سیمپۆزیۆمێکی تایبەت بە کەرتی وزەی سووریا
رووداو دیجیتاڵ
نێردەی تایبەتی ئەمریکا بۆ سووریا پێی وایە سووریا دەتوانێت ببێتە ناوەندێکی گەورەی وزە لە ناوچەکەدا، تەنانەت ببێتە شوێنگرەوەی گەرووی هورمز و دەریای سوور، باڵیۆزی سووریاش لە نەتەوەیەکگرتووەکان بە رووداوی گوت، سووریا کاتێک دەتوانێت ببێت بەو ناوەندەی وزە کە هەموو گەلانی وڵاتەکە بە کورد و پێکهاتەکانی دیکەش بەیەکەوە کۆبکاتەوە.
دوای چەندین ساڵ لە داخرانی هەموو دەرگەکان، ئەم ساڵ بۆ یەکەم جار لە واشنتن، سیمپۆزیۆمێکی تایبەت بە کەرتی وزەی سووریا بەڕێوەچوو و تێیدا تۆم باراک، نێردەی تایبەتی ئەمریکا بۆ سووریا و ئیبراهیم عولەبی، باڵیۆزی سووریا لە نەتەوە یەکگرتووەکان و ژمارەیەک بەرپرس و کەسایەتی و بازرگانی سووریش بەشداربوون.
ئیبراهیم عولەبی بە رووداوی گوت: ''رێگەی ئەوەی سووریا ببێتە ناوەندێکی وزە ئەوەیە بەر لە هەموو شتێک هەموو پێکهاتەکانی سووریا بەیەکەوەبن و بەیەکەوە کاربکەن بۆ هەبوونی سووریایەکی یەکگرتوو و بەهێز کە هاوبەشی سەرچاوە سرووشتییەکانیان بکەن."
دەشڵێت: هەر بەشێکی سووریا خاوەن سەرچاوەی جیاوازە، هەیە بەندەری هەیە، هەیانە نەوت و هەشیانە کشتوکاڵ تاوەکو دوایی.. هەروەها سووریا دەوڵەمەندە هەم لە رووی سەرچاوەی وزە هەمیش لە رووی توانای هەناردەکردن و هاوردەکردنی سەرچاوە سرووشتییەکان. "بۆیە یەکەمین شت بۆ ئێمە بەیەکەوەبوونمانە، کە حکومڕانییەکی باشمان هەبێت، ژێرخان و یاسای باشمان هەبێت، هەروەها خاڵی بەیەکگەیشتنی باش و توانای پێکەوە کارکردنمان هەبێت.''
لەو کۆبوونەوەیەدا بە وردی توانای سەرچاوە سرووشتییەکانی سووریا و هەروەها سنووری سووریا بە بازاڕە جیهانییەکان باسکرا، ئاماژە بەوە درا، سووریا خاوەن وڵاتێکی دەوڵەمەندە لە سەرچاوەی سرووشتی و هەڵکەوتە جوگرافییەکەیشی یارمەتیدەرە تاوەکو بتوانێت رۆڵێکی گرنگی هەبێت لە گواستنەوەی وزەی جیهاندا.
مەیسن هەتاهت، بەڕێوەبەری جێبەجێکاری سریڤیۆم بە رووداوی گوت: گەشبینییەکی زۆر هەیە، بەتایبەتیش کە لە کوێ هاتووین و بەرەو کوێ دەڕۆین، وزەیەکی زۆر هەیە و کۆمپانیای زۆریش هەن کە خواستیان هەیە وەبەرهێنان بکەن، ئەوەی هەیە لەسەر کات و چوارچێوە یاساییەکان وەستاوە، هەروەها لەسەر یاسا داراییەکان وەستاوە، ئەوەی دیکە تەنیا جێبەجێکردنی کارەکان ماوە.
بەشێکی ئەم گفتوگۆیانەش تایبەت بوون بە پرسی کورد لە سووریا و تێکەڵبوونی هێزەکانی سووریای دیموکرات بە حکومەتی سووریا، بەو پێییەی بەشێکی زۆری سەرچاوە سرووشتییەکان دەکەونە رۆژئاڤای کوردستان و بەبێ هاوئاهەنگی و رەزامەندی کورد، داهاتووی وزەی سووریا سەرکەوتوو نابێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ