رووداو دیجیتاڵ
هێزەکانی ئاسایشی ناوخۆی حەلەب ئاشکرای دەکات، لە ئەنجامی هێرش و بۆردوومانی سێ رۆژی رابردووی سوپای عەرەبیی سووریا بۆ سەر گەڕەکەکانی شێخ مەقسوود و ئەشرەفییە، 8 کەس گیانیان لەدەستداوە و 57ی دیکەش بریندار بوون.
رۆژی پێنجشەممە 08-01-2026 ناوەندی راگەیاندنی هێزەکانی ئاسایشی ناوخۆی حەلەب لە راگەیێندراوێکدا ئاماری زیانەکانی سێ رۆژ بۆردوومانی بڵاوکردەوە و رایگەیاند، ئەو گرووپانە بە تۆپ، مووشەک، تانک و فڕۆکەی بێ فڕۆکەوان (درۆن) ناوچە نیشتەجێنشینەکان دەکەنە ئامانج.
بەگوێرەی راگەیێندراوەکە، شەوی رابردوو بۆردوومانەکان بۆسەر ماڵ و حاڵی هاونیشتمانییان چڕتر کراونەتەوە، بۆئەوەی زۆرترین قوربانیی لێبکەوێتەوە، هاوکات ژمارەیەکی زۆر چەکدار کە لەنێویاندا بیانی هەن، لەگەڵ تانک و زرێپۆش رەوانەی ناوچەکە کراون بۆ تووندکردنەوەی گەمارۆکان.
ئاسایشی حەلەب دەڵێت، ئەو هێزانە شکستیان هێناوە لەوەی لە میحوەری کاستێلۆوە پێشڕەوی بکەن، بۆیە پەنایان بۆ "سزای بەکۆمەڵ" بردووە؛ کارەبایان بڕیوە و رێگری دەکەن لەوەی خۆراک و دەرمان بگاتە دەست دانیشتووانی شێخ مەقسوود و ئەشرەفییە.
لە کۆتایی راگەیێندراوەکەدا، ئاسایشی حەلەب هۆشداری دەدات لەوەی بەردەوامیی ئەم دۆخە ئەنجامی مەترسیداری دەبێت و لایەنە هێرشبەرەکان بە پێشێلکردنی "رێککەوتنی 1ـی نیسان" تۆمەتبار دەکات.
لە رۆژی سێشەممەوە گەڕەکەکانی شێخ مەقسوود و ئەشرەفییە کەوتوونەتە بەر هێرشی تووندی سوپای عەرەبیی سووریاوە.
هەسەدە، رایگەیاندووە حکومەتی سووریا زیاتر لە دوو هەفتەیە گەمارۆیەکی تووندی خستووەتە سەر ئەو دوو گەڕەکەی حەلەب و رێگە نادات سووتەمەنی و پێداویستیی پزیشکی بچێتە ژوورەوە. ئەمەش وایکردووە نەخۆشخانەکان لەکار بکەون و مۆلیدەکانی کارەبا بوەستن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ