رووداو دیجیتاڵ
وەزارەتی بەرگریی سووریا دەڵێت، ژمارەی کوژراوانی شەڕەکەی پارێزگای سوەیدای وڵاتەکە بۆ زیاتر لە 30 کەس و ژمارەی بریندارانیش بۆ سەروو 100 کەس بەرزبووەتەوە.
ئەمڕۆ دووشەممە 14-07-2025 وەزارەتی بەرگریی سووریا راگەیێندراوێکی لەبارەی گرژییەکانی پارێزگای سوەیدا بڵاوکردەوە و تێیدا هاتووە، "بە خەم و نیگەرانییەکی قووڵەوە چاودێریی ئەو پێشهاتە خوێناوییانە دەکەین کە لە دوو رۆژی رابردوودا پارێزگای سوەیدایان گرتووەتەوە، کە بوونەتە هۆی گیانلەدەستدانی زیاتر لە 30 کەس و برینداربوونی نزیکەی 100 کەسی دیکە لە ژمارەیەک گەڕەک و شارۆچکەدا."
شەڕەکە لەنێوان چەکدارانی دروز و چەکدارانی هۆزەکانە.
سەرچاوە خۆجێییەکانی سووریا باس لەوە دەکەن، 37 کەس کوژراون کە 27 کەسیان دروزن و 10 کەسەکەی دیکەش چەکداری سەر بە هۆزەکانن.
وەزارەتی ناوخۆی سووریاش لە راگەیێندراوێکدا گوتی، بە هاوئاهەنگی وەزارەتی بەرگری سووریا، هێزی زیاتر رەوانەی ناوچەکە دەکەن.
ئەو وەزارەتە گوتی، هەوڵی هێورکردنەوەی دۆخەکە دەدەن، ئارامی و ئاسایش دەچەسپێنن، لێپێچینەوە لەو کەس و لایەنانە دەکەن کە بوونەتە هۆی دروستبوونی شەڕەکە.
مستەفا بەکور، پارێزگاری سوەیداش داوای لە دانیشتووانی ناوچەکە کرد دان بە خۆیاندا بگرن و رێگە نەدەن شەڕەکە گەورەتر بێت.
پارێزگای سوەیدا کەوتووەتە باشووری سووریا و زۆرینەی دانیشتووانەکەی دروزن. دروزەکان پێکهاتەیەکی ئایینین و نزیکەی 3%ی دانیشتووانی سووریا پێکدەهێنن و چەکداری تایبەت بە خۆیان هەیە.
پارێزگای سوەیدا هاوسنوورە لەگەڵ پارێزگای دەرعا. بەرپرسانی دەرعا ترسیان لە زیادبوونی گرژییەکان هەیە.
لە دوای رووخانی دەسەڵاتی ئەسەدەوە لە 08-12-2024ەوە چەند جارێک شەڕ لەنێوان چەکدارانی دروز و چەکدارانی هۆزەکان یان حکومەتی سووریادا دروستبووە، دیارترینیان لە کۆتایی نیسان بۆ سەرەتای ئایار بوو. بە گوێرەی سەرچاوە خۆجێییەکان، ئەو کات لە شەڕەکەدا 119 کەس کوژران.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ