عەلەوییەکان لە دژی دەسەڵاتی نوێ رژاونەتە سەر شەقامەکان.
رووداو دیجیتاڵ
حکومەتی نوێی سووریا لە سەرەتای دەسەڵاتیدا رووبەڕووی خۆپێشاندان و ناڕەزایی عەلەوی و کریستیانەکان بووەتەوە.
عەلەوییەکان لە شاری جەبلەیە لە پارێزگای لازقییە خۆپێشاندانیان کرد و دەڵێن، بەهۆی سووتانی مەزارێکیان هاتوونەتە سەر شەقام.
لە شاری تەڕتووسیش کە زۆرینەی عەلەوین، خۆپێشاندانێک کرا و داوای ئازادکردنی گیراوەکانیان لە دەستی تەحریر شام دەکەن.
سەحەر حەسەن، دایکی بێسەروشوێنبوویەک لەنێو خۆپێشاندەرانەوە دەڵێت، "ئێمە کوڕەکانی خۆمانمان دەوێت، دەمانەوێت ئازاد بکرێن و ئەوان هیچ کارێکی خراپیان نەکردووە و بێتاوانن و دەمانەوێت ئازاد بکرێن و ئازادیمان دەوێت."
عەلەوییەکان لەسەدا 10ـی ژمارەی دانیشتووانی سووریا پێکدەهێنن و زیاتر لە نیو سەدە حوکمی سووریایان کردووە. عەلەوییەکان دەترسن ئەمجارە سوننەکان تۆڵەی چەند ساڵی پێشوویان لێبکەنەوە.
ترس لە دەسەڵاتی نوێی سووریا کریستیانەکانیشی گرتووەتەوە.
یامین باسمار، کریستیانێکی سووریاییە و باس لە دۆخی سووریا لە حوکمەتی نوێی سووریا دەکات و دەڵێت، "بەشێوەیەکی گشتی، ترس لەنێو خەڵکدا هەیە و خەڵک دەترسن لەدوای کاژێر 10ـی شەو بێنە دەرەوە، بەگشتی هەستێکی ترس لەنێو خەڵکدا هەیە."
لەدوای فراوانبوونی خۆپێشاندانەکان، حکومەتی سووریا بڕیاری قەدەخەی هاتووچۆی لە شارەکانی حیمس، تەڕتووس و جەبلە دا.
کەمتر لە سێ هەفتەیە دەسەڵاتی نوێ لە سووریا دەست بەکاربووە، بەڵام ترس لە حوکمەتی نوێ، بووەتە قەیرانێکی دیکە لە وڵاتەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ