رووداو دیجیتاڵ
ئەمڕۆ شەممە، 3-6-2023 رەجەب تەیب ئەردۆغان وەک سەرۆککۆماری تورکیا سوێندی یاسایی خوارد، ئەوەش دوای ئەوەی لە گەڕی دووەمی هەڵبژاردنی سەرۆکایەتییدا 27 ملیۆن و 834 هەزار و 589 دەنگ کە دەکاتە 52٪ی دەنگەکانی بەدەستهێنا.
کاژێر 15:00 بە کاتی ئەنقەرە (هەمان کات بە گوێرەی هەولێر) رەجەب تەیب ئەردۆغان لە پەرلەمانی تورکیا سوێندی یاسایی خوارد و بەڵگەنامەی دەستبەکاربوونیشی لە لایەن دەوڵەت باخچەلی، سەرۆکی کاتیی پەرلەمانەوە رادەست کرا.
دوای سوێندخواردنەکە، سەرۆککۆماری تورکیا سەردانی گڵکۆی مستەفا ئەتاتورک، دامەزرێنەری کۆماری تورکیا دەکات و کاژێر 17:00ش بەشداری لە رێوڕەسمی دەستبەکاربوون دەبێت کە لە کۆشکی کۆمری بەڕێوەدەچێت.
لە کاتی گەیشتنی ئەردۆغان و یەکەی ئەسپسوار بۆ کۆشکی کۆماری، 101 تۆپ دەتەقێندرێن؛ هەروەها لە بارەگاکانی سەر بە فەرماندەیی ئاسمانی، وشکانی و دەریایی 101 تۆپ دەتەقێندرێن.
هەر لە رێوڕەسمەکەدا ئۆرکێسترای سەمفۆنیای سەرۆکایەتیی کۆمار، تیمی میوزیکی کلاسیکی تورکیی سەرۆکایەتیی کۆمار، تیمی میوزیکیی سەربازیی سوپای تورکیا و تیمەکانی نمایشی سوپای تورکیا ئامادە دەبن.
دواتریش خوانی ئێوارە لە کاژێر 19:00 لە کۆشکی چانکایا رێک دەخرێت و میوانان لەوێ دەبن و دواتریش چاوەڕوان دەکرێت ئەردۆغان ناوی ئەندامانی کابینەکەی رابگەیێنێت.
لە رێوڕەسمەکەدا نێچیرڤان بارزانی، سەرۆکی هەرێمی کوردستان، 21 سەرۆکی وڵاتان، 13 سەرۆکوەزیرانی وڵاتان، 12 سەرۆکی پەرلەمان و نوێنەرانی 8 رێکخراوی نێودەوڵەتی ئامادە دەبن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ