رووداو دیجیتاڵ
وەزارەتی دەرەوەی تورکیا بە تووندی سەرکۆنەی هێرشکردنە سەر فڕۆکەخانەیەکی نزیک لە ناوچەی نەخچیڤان لە ئازەربایجان دەکات کە بەهۆیەوە دوو کەس برینداربوون و زیانی مادی زۆری لێکەوتەوە.
لە راگەیێندراوە نووسراوەکەی وەزارەتی دەرەوەی تورکیادا هاتووە: "بە تووندی سەرکۆنەی ئەو هێرشە درۆنییانە دەکەین کە ئەمڕۆ (5ی ئادار) کرانە سەر کۆماری خۆسەری نەخچیڤانی ئازەربایجان."
لە بەشێکی دیکەی راگەیێندراوەکەدا دەڵێت: "جارێکی دیکە جەخت لەوە دەکەینەوە کە پێویستە دەستبەجێ کۆتایی بەو هێرشانە بهێندرێت کە وڵاتانی سێیەم لە ناوچەکە دەکەنە ئامانج و مەترسیی گەوربوونی شەڕ زیاد دەکەن. تورکیا، وەک هەمیشە لە پاڵپشتیی ئازەربایجان بەردەوام دەبێت."
رۆژی 05-03-2026، وەزارەتی دەرەوەی ئازەربایجان لە راگەیێندراوێکدا گوتی، درۆنەکان لە ئێرانەوە ئاراستەی نەخچیڤان کراون. باکوو بە تووندی هێرشەکەی سەرکۆنە کرد و رایگەیاند: "ئازەربایجان مافی وەڵامدانەوەی ئەم هێرشانەی بۆ خۆی پاراستووە."
گرژییەکان لە ناوچەکەدا بەهۆی شەڕی نێوان ئێران و هاوپەیمانیی (ئەمریکا و ئیسرائیل) گەیشتووەتە لووتکە. دوێنێش تورکیا رایگەیاند، مووشەکێکی ئێرانی لە ئاسمانی وڵاتەکەی تێکشکێندراوە، ئەمەش نیشانەی فراوانبوونی جەنگەکەیە بۆ وڵاتانی دراوسێی ئێران.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ