رووداو دیجیتاڵ
لە 5 پارێزگای باکووری کوردستان و 19 پارێزگای تورکیا، بەهۆی بارینی بەفر و نالەباریی کەشوهەوا، یەک رۆژ قوتابخانەکان داخران.
ئەمڕۆ (پێنجشەممە، 6-2-2025) لە پارێزگاکانی جۆلەمێرگ، سێواز، خارپێت، ئەرزینگان و دێرسم ـی باکووری کوردستان و پارێزگاکانی دوزجە، نیدە، ئۆردو، نەوشەهیر، ئادانا، قەیسەری، گوموشهانە، بۆڵو، زۆنگوڵداک، ساکاریا، یۆزگات، کۆجائەلی، ترابزۆن، کۆنیا، ئاکسارای، گیرەسوون، سامسوون، سینۆپ و یاڵۆڤا ـی تورکیا، قوتابخانەکان بەهۆی زۆری بەفربارین و مەترسی سەهۆڵبەندان، داخران و مۆڵەتی کارگێڕی بە فەرمانبەرانی کەرتی گشتی دراوە.
بەگوێرەی راگەیێندراوی پارێزگاکان، لە سێواز و ئەرزینگان لە سەرتاسەری پارێزگا، لە پارێزگای جۆلەمێرگ لە شارۆچکەکانی گەڤەر و شەمزینان، لە پارێزگای خارپێت لە ناوەندی شار پشووە و دەسەڵات دراوەتە کارگێڕیی شارۆچکەکان بەگوێرەی بارودۆخی کەشوهەوا خۆیان بڕیار بدەن. لە پارێزگای دێرسم تەنیا لە شارۆچکەی پلەموورییە پشووە.
لەو پارێزگا و شارۆچکانەدا کە پشووی خوێندن راگەیێندراوە، فەرمانبەرانی حکومی خاوەن پێداویستیی تایبەت و ژنانی دووگیان، ناچنە سەرکار و ئەو رۆژەیان وەک مۆڵەتی کارگێڕی بۆ هەژمار دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ