هەڵەیەک روویدا! دووبارە هەوڵبدە
رووداو دیجیتاڵ
وەزیری نێوخۆی تورکیا ئاشکرای کرد، تائێستا نزیکەی 238 هەزار پەنابەری سووریایی وڵاتینامەی تورکیایان وەرگرتووە. نزیکەی 156 هەزار کەسیان تەمەنی 18 ساڵیان تێپەڕاندووە.
لە چوارچێوەی کۆبوونەوەکانی پلان و بودجەی وەزارەتەکەیدا عەلی یەرلیکایا، وەزیری نێوخۆی تورکیا ئێوارەی رۆژی چوارشەممە 8ـی تشرینی دووەمی 2023، باسی لە ئامار و رێکارەکانی پێدانی وڵاتینامەی تورکی بە پەناخوازانی سووریایی کرد.
بەگوێرەی ئاماری وەزیری نێوخۆی تورکیا، 237 هەزار و 995 سووریایی وڵاتینامەی تورکیایان پێدراوە. 156 هەزار و 987 لەوانە تەمەنی 18 ساڵیان تێپەڕاندووە. هەروەها ئەو سووریاییانەی لە نێو کامپ و خانووی کاتیدا دەژین، ژمارەیان سێ ملیۆن و 254 هەزار و 904 کەسە.
بەگوێرەی راپۆرتێکی وەزارەتی نێوخۆی تورکیا، کە 19-10-2023 نوێکراوەتەوە، ژمارەی پەنابەرانی تۆمارکراوی سووریایی لە باکووری کوردستان و تورکیادا سێ ملیۆن و 264 هەزار و 248 کەسە.
بەگوێرەی راپۆرتەکە ژمارەی پەنابەرانی تۆمارکراوی سووریایی لە تورکیا بەراورد بە 1-1-2023 کەمبووەتەوە و لەوکاتەوە 271 هەزار و 650 پەنابەری سووری لە تۆمارەکان سڕاونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ