هەڵەیەک روویدا! دووبارە هەوڵبدە
رووداو دیجیتاڵ
وەزیری نێوخۆی تورکیا رایگەیاند، بوومەلەرزەیەک بە گوڕی 6.1 پلەی رێختەر لە ناوچەی سندرگی لە پارێزگای باڵکئەسیر روویدا و "تاوەکو ئێستا هیچ زیانێکی گیانیی نەبووە."
ئەمڕۆ شەممە، عەلی یەرلیکایا، وەزیری نێوخۆی تورکیا رایگەیاند، "بوومەلەرزەیەک بە گوڕی 6.1 پلەی رێختەر لە ناوچەی سندرگی لە پارێزگای باڵکئەسیر روویدا. تەواوی تیمەکانمان بەرەو شوێنی بوومەلەرزەکە ناردووە. تاوەکو ئێستا هیچ زیانێک جێی باس نییە."
سەرکان ساک، سەرۆکی شارەوانیی سندرگی بە میدیاکانی راگەیاند، "لە سنووری شارەوانییەکانمان نزیکەی 10 باڵەخانە رووخاون و تیمەکانمان بەپەلە گەیشتنە ئەوێ. ستافێکی تایبەتمان بەپەلە رێکخستووە و بە هاوئاهەنگی دەستیان بە هەڵمەتی رزگارکردن کردووە."
دیمەنێکی بوومەلەرزەکەی پارێزگای باڵکئەسیری تورکیا گەیشت؛ باڵەخانەیەک رووخاوە و خەڵک بەدوای قوربانییەکاندا دەگەڕێن
— Rudaw (@Rudawkurdish) August 10, 2025
گوڕی بوومەلەرزەکە 6.1 پلە بوو، بەڵام هێشتا هیچ زانیارییەک لەسەر ئاماری گیانلەدەستدان و بریندار نییە pic.twitter.com/MpbUqnknqi
سەرۆکی شارەوانیی سندرگی هەروەها دەڵێت، هێشتا نەیانتوانیوە تیمەکان بنێرنە تەواوی باڵەخانە رووخاوەکان. تیمەکان هەروەها ژمارەیەک هاووڵاتییان لە ژێر داروپەردوو دەرهێناوە.
بەگوێرەی سەرۆکایەتیی بەڕێوەبردنی کارەسات و باری لەناکاو لە تورکیا (ئافاد) بوومەلەرزەکە کاژێر 7:53ی ئێوارەی ئەمڕۆ شەممە روویدا. ناوچەی سندرگی لە پارێزگای باڵکئەسیر چەقی بوومەلەرزەکە بوو.
بوومەلەرزەکە لە ئیستەنبووڵ، ئیزمیر، بورسە، ئایدن، یەڵۆڤا، ئێسکیشەهیر و ئەنقەرە هەستی پێکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ