رووداو دیجیتاڵ
ئەنجامەکانی راپرسییەکی نوێ لە تورکیا سوپرایزێکی گەورەی تێدایە؛ لە کاتێکدا زۆرینەی خەڵک سەڵاحەدین دەمیرتاش وەک نوێنەری داواکارییەکانی کورد دەبینن، بەڵام دەنگدەرانی ئاکپارتی و مەهەپە، عەبدوڵڵا ئۆجەلان-یان پێ باشترە.
ناوەندی راپرسی و راوێژکاریی ئانک-ئار (Ank-Ar) راپرسییەکی لەژێر ناونیشانی "کێ باشتر نوێنەرایەتیی داواکاری و بۆچوونی کورد دەکات؟" کردووە. ئەنجامە گشتییەکان دەریدەخەن کە لەسەر ئاستی تورکیا، سەڵاحەدین دەمیرتاش بە رێژەی 63.9% لە پێشە، لە بەرامبەردا عەبدوڵڵا ئۆجەلان 22.6%ـی دەنگەکانی بەدەستهێناوە.
هاوپەیمانیی جمهور؛ "ئۆجەلان"یان لا پەسندترە
ئەوەی بووەتە جێگەی سەرسوڕمانی چاودێرانی سیاسی، هەڵوێستی دەنگدەرانی باڵی دەسەڵاتە (ئاکپارتی و مەهەپە). بەپێی راپرسییەکە، بنکەی جەماوەریی ئەو دوو پارتە بە پێچەوانەی شەقامی تورکیاوە بیردەکەنەوە:
- دەنگدەرانی ئاکپارتی: 48.0% پێیانوایە ئۆجەلان نوێنەرایەتیی کورد دەکات، لە بەرامبەردا 41.0% بۆ دەمیرتاش.
- دەنگدەرانی مەهەپە: 44.5% ئۆجەلانیان هەڵبژاردووە، لە بەرامبەر 40.9% بۆ دەمیرتاش.
دەم پارتی و ئۆپۆزیسیۆن لەسەر دەمیرتاش کۆکن
لەنێو لایەنگرانی دەم پارتیدا، کە پێگەی سەرەکیی دەنگی کوردن، جیاوازییەکە زۆر گەورەیە؛ 80%ـی دەنگدەرانی دەم پارتی دەمیرتاش بە نوێنەری راستەقینەی خۆیان دەزانن و تەنیا 17.9% ناوی ئۆجەلانیان هێناوە.
پارتەکانی دیکەی ئۆپۆزیسیۆنیش بە هەمان شێوە دەمیرتاش وەک لایەنێکی "شەرعیتر" دەبینن:
- جەهەپە: 82.4% دەمیرتاش و 11.6% ئۆجەلان
- ئیی پارتی: 71.4% دەمیرتاش و 8.2% ئۆجەلان
- پارتیی سەرلەنوێ رەفاهـ: 69.1% دەمیرتاش و 21.8% ئۆجەلان
ئەم راپرسییە لە کاتێکدایە کە ناوە ناوە پرسی "پرۆسەی ئاشتی" یان گفتوگۆ لە تورکیا گەرم دەبێتەوە. ئەنجامەکان ئاماژە بەوە دەکەن کە شەقامی تورکیا و ئۆپۆزیسیۆن، دەمیرتاش وەک کارەکتەرێکی سیاسیی شەرعی بۆ گفتوگۆ دەبینن، بەڵام دەنگدەرانی دەسەڵات (ئاکپارتی و مەهەپە) زیاتر مەیلیان بەرەو لایەنی ئۆجەلانە، ئەمەش رەنگدانەوەی ئەو گوتارە سیاسییەیە کە دەسەڵات لەم دواییانەدا لەسەر پرسی "دیالۆگ" لەگەڵ ئیمراڵی جارێکی دیکە وروژاندوویەتی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ