دوای جنێودان و سووکایەتی و ئازاردانیان، باوکەکە و كوڕێكی تەمەن 12 ساڵیان برینداركردووە
رووداو دیجیتاڵ
خێزانێكی كوردی خەڵكی شاری هەولێر لە پارێزگای مێرسینی تورکیا رووبەڕووی هێرشی چەند توركێك بوونەوە. دوای سوكایەتیكردن و جنێودان بەكورد، خێزانە كوردەكەیان بەردباران كردووە و پیاوی خێزانەكە و كوڕێكیان برینداربوون. باوكەكە بەهۆی سەختی برینەكەیەوە رەوانەی نەخۆشخانە كراوە.
شایەتحاڵێک ڤیدیۆی دوای هێرشەكەی سەر ئەو خێزانە كوردەی بۆ تۆڕی میدیایی رووداو ناردووە. تێیدا دەردەكەوێت، پیاوەکە لەسەر رێگاكە كەوتووە و لەهۆش خۆی چووە. هاوژینەكەی بەدەم گریانەوە هاوار دەكات و داوای ئامبووڵانس دەكات. لەلایەكی دیكەشەوە ئەندامانی خێزانەكە دەگرین.
هێرشکردنە سەر خێزانەکەی هەولێر لەلایەن رەگەزپەرستان لە تورکیا لەنێوان هەردوو شارۆچکەی ئاناموور و بۆزیازی سەر بە مێرسین روویداوە و ئێستا باوک و کوڕەکەی لە نەخۆشخانەی ئاناموور لەژێر چارەسەریدان.
شایەتحاڵەکە بەتۆڕی میدیایی رووداوی راگەیاند، ئەو خێزانە کوردە لە ئاداناوە بەرەو ئەنتاڵیا بەڕێکەوتبوون، كاژێر 16:00ی رۆژی پێنجشەممە 13-5-2021 لەسەر رێگای سەرەكیی شارۆچكەی ئاناموور لە پارێزگای مێرسین، لەلایەن چوار كەسەوە رێگرییان لێدەکرێت.
دوای جنێودان و سووکایەتی و ئازاردانیان، باوکەکە و كوڕێكی تەمەن 12 ساڵیان برینداركردووە. دەشڵێت، بینیم بەردبارانیان دەكردن و لەسەریان دەدان و هەوڵیان دەدا باوکەکە لە بەرزاییەكدا بخەنە خوارەوە.
شایەتحاڵەکە لەبارەی هۆکاری رووداوەکە دەڵێت، گوایە شەڕەكە بەهۆی رێگەنەدان بووە بە ئۆتۆمبێلی هێرشكارەكان و ئەوانیش دەستیانكردووە بە لێدان و ئازاردانی ئەو خێزانە . دەشڵێت "ئەو چوار كەسەی هێرشەکەیان کردووە ماوەی پێنج خولەك زیاتر جنێویان بەكورد دەدا و بەپەنجەكانیان وەک ئاماژەی گورگی بۆر بەرزدەكردەوە، بۆیە ئەوانە نەتەوەپەرستە فاشیزمەكان بوون و هێرشەكەشیان هەر لەم روانگەیەوە بووە".
شایەتحاڵەکە لەبارەی چارەنووسی خێزانەکەوە گوتی "دوای ئەوەی خۆم گەیاندە خێزانەكە، پیاوە بریندارەكەم تاوەکو بنكەی هێزەكانی جەندرمەی ناوچەكە گواستەوە و لەوێش ئامبووڵانسیان بانگكرد و ناردیانە نەخۆشخانە. منیش لە بنكەی هێزەكانی جەندرمە گوتەی خۆم تۆماركرد و رووداوەكەم بەمشێوەیەی ئێستا بۆیان گێڕایەوە".
لە ڤیدیۆكەدا كە بۆ رووداو نێردراوە، ژنێكی كورد هاوژینە بریندارەكەی لەناوەڕاستی شەقامەكەدا لە باوەش گرتووە و بەدەم گریانەوە داوای یارمەتی و ئامبووڵانس دەكات بۆ گواستنەوەی هاوژین و كوڕەكەی بۆ نەخۆشخانە. هێرشكارەكان بە ئۆتۆمبێلێكی جۆری هۆندا سیڤیك Honda Civic رەنگ رەش بەتابلۆی 01 YG 428 لە شوێنی رووداوەكەدا دوور دەكەونەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ