هەڵەیەک روویدا! دووبارە هەوڵبدە
رووداو دیجیتاڵ
سەرۆککۆماری تورکیا داوا لە هێزەکانی سووریای دیموکرات (هەسەدە) دەکات، تێکەڵی سوپای سووریا ببن و پشتگیری یەکێتی و یەکپارچەیی خاکی ئەو وڵاتە بکەن.
رەجەب تەیب ئەردۆغان، سەرۆککۆماری تورکیا دوای بەشداریکردنی لە لووتکەی ئاشتیی غەززە لە میسر، شەوی رابردوو گەڕایەوە تورکیا.
ئەردۆغان لە نێو فڕۆکەدا قسەی بۆ رۆژنامەڤانان کرد و رایگەیاند، پەیوەندییەکی چڕ و پڕیان لەگەڵ سووریا لە هەموو بوار و ئاستێکدا هەیە و بەردەوامە.
ئەردۆغان لە وەڵامی پرسیاری رۆژنامەڤانان لەبارەی سووریا گوتی: "بڕیارمان داوە بۆ پاراستنی دەستکەوتەکانی سووریا و ناوچەکە، هاوئاهەنگی و هاوکارییەکی بەهێزترمان هەبێت. سەرۆککۆماری سووریا ئەحمەد شەرع و هاوڕێکانی بە تەنیا جیناهێڵین و ئەمە نابێتە جێی باس.
سەبارەت بە هەسەدە، سەرۆککۆماری تورکیا گوتی: "زۆرجار هێزەکانی سووریای دیموکرات (هەسەدە) ئاگادار دەکەینەوە کە رێگەی هەڵە نەگرنەبەر و پشتگیری یەکێتی و یەکپارچەیی سووریا بکەن. هیوادارین هەڵوێستی خۆیان لەپێناو یەکپارچەیی خاکی سووریا و گەیشتن بە داهاتوویەکی یەکگرتوو و خۆشگوزەران نیشان بدەن".
ئەردۆغان هەروەها رایگەیاند، یەکگرتنی هەسەدە لەگەڵ هێزەکانی سوپای سووریا لە کورتترین ماوەدا، هەنگاوەکانی گەشەپێدانی ئەو وڵاتە خێراتر دەکات، هەروەها گوتی:" ئێمە ستایشی حکومەتی سووریا دەکەین؛ چونکە بە تێگەیشتنێکەوە روو لە داهاتوو دەکات کە هەموو پێکهاتە نەتەوەیی و ئایینییەکانی وڵات لەخۆدەگرێت. ئەمە لە بەرژەوەندیی سووریا و تورکیاشە. ئەوانەی هەوڵ دەدەن جارێکی دیکە سووریا بخەنە ناو گێژاوی ناکۆکییەوە، خێری کورد، درووز و عەلەوییەکانیان ناوێت".
ئەردۆغان هەروەها لەبارەی دانوستاندن و دیالۆگەوە دوا و رایگەیاند، ئەوانەی روو لە ئەنقەرە و دیمەشق دەکەن سەر دەکەون و ئەوانەش کە بەدوای پارێزەرێکی دیکەدا دەگەڕێن، شکست دەهێنن.
تورکیا بەردەوام داوا لە هەسەدە دەکات بچێتە ریزی سوپای سووریا، هەسەدەش ئامادەیی خۆی بۆ ئەم پرسە نیشان داوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ