لە تورکیا و باکووری کوردستان 153 کەس بە تۆمەتی داعش دەستبەسەرکران

 

عەلی یەرلیکایا، وەزیری ناوخۆی تورکیا ئەمڕۆ هەینی 18ـی تەمموزی 2025 لە تۆڕی کۆمەڵایەتیی ئێکس ئەنجامی ئەو ئۆپەراسیۆنانەی بڵاوکردەوە، کە بە مەبەستی دەستگیرکردنی ئەو کەسانە کراون و تۆمەتبارن بە ئەندامبوون لە رێکخراوی داعش یان کارکردن بۆی.

 

بەگوتەی یەرلیکایا، لەو ئۆپەراسیۆنانەی لە دوو هەفتەدا لە چوار پارێزگای باکووری کوردستان و 24 پارێزگای تورکیا کراون، 153 کەس دەستبەسەرکراون. 

 

ئۆپەراسیۆنەکان لەلایەن بەڕێوەبەرایەتییەکانی پۆلیس و فەرماندەییەکانی جەندرمەی پارێزگاکان بە هاوئاهەنگیی سەرۆکایەتیی داواکارانی گشتی و سەرۆکایەتیی بەرەنگاربوونەوەی تیرۆر و سەرۆکایەتی هەواڵگری ئەنجامدراون.

 

وەزیری ناوخۆی تورکیا دەڵێت، لەو ئۆپەراسیۆنانەدا کە لە پارێزگاکانی دیلۆک، مێردین، مەڕەش و روهای باکووری کوردستان و پارێزگاکانی ئادانا، ئانتاڵیا، ئایدن، بورسا، چانکری، چۆروم، ئەسکیشەهیر، هاتای، ئیستەنبووڵ، ئیزمیر، کاستامۆنو، کرشەهیر، کۆجائەلی، کوتاهیا، مانیسا، مێرسین، موغڵا، نەوشەهیر، عوسمانییە، ساکاریا، سامسوون، تەکیرداغ، یاڵۆڤا و زۆنگوڵداکی تورکیا کراون، 153 کەس دەستبەسەرکراون کە لەنێو رێکخراوی داعش کاریان کردووە و بانگەشەیان بۆ کردووە، هەروەها پاڵپشتی دارایی رێکخراوەکەیان کردووە. 

 

لە ئۆپەراسیۆنەکاندا چەندین بەڵگەنامەی رێکخراوەیی و کەرەستەی دیجیتاڵی لەگەڵ دەمانچەی بێ مۆڵەت دەستیان بەسەرداگیراوە.