هەڵەیەک روویدا! دووبارە هەوڵبدە
رووداو دیجیتاڵ
کۆنسێرتێک لە ئێلیهی باکووری کوردستان بە ناوی (ناوی برایەتی، تورکیایە) سازدرا و تێیدا گۆرانی بە کوردی، تورکی و زمانی دیکەش گوتران.
کۆنسێرتەکە شەوی سێشەممە 19-8-2025 بە پاڵپشتیی پارێزگا و شارەوانیی ئێلیهـ بەرێوەچوو.
تیپی میوزیکی کۆلیژی ھونەرە جوانەکانی شارەکە ئامادەبوون و چەندین گۆرانی بە زمانەکانی تورکی، کوردی، سریانی و زمانی دیکە پێشکێشکران.
پەیامی سەرەکیی کۆنسێرتەکە ئاشتی و برایەتی بوو و تەواوی بەرنامەکە لە کەناڵی فەرمیی دەوڵەتی تورکیا پەخشکرا.
جگە لە بەرهەمی هونەری، چەندین مامۆستای زانکۆ و کەسایەتیی ئێلیهـ چوونە سەر ستەیج و پشتیوانیی خۆیانیان بۆ پرۆسەی چارەسەری نیشاندا.
د. ئیدریس دەمیر، سەرۆکی زانکۆی ئێلیهـ قسەی بۆ رۆژنامەڤانان کرد و کۆنسێرتەکەی بە "مانادار" ناوبرد، بەتایبەتی لەم کاتەدا کە کۆبوونەوەکانی لیژنەی تایبەت بە پرۆسەی چارەسەری لە پەرلەمانی ئەو وڵاتەدا بەردەوامن.
ئیدریس دەمیر گوتی: "لەسەر ئەو رێگەیەی بەڕێز سەرۆککۆمار و گەورە بەرپرسانی دەوڵەتمان کردوویانەتەوە، هەروەها لە چوارچێوەی کارەکانی لیژنەی پاڵپشتیی نیشتمانی، برایەتی و دیموکراسی، بە شوێنپێی بەڕێز سەرۆککۆمار و گەورە بەرپرسانی دەوڵەتمان، ئەم کۆنسێرتەمان رێکخست. هەوڵ دەدەین ئاوازی ناوچە جیاوازەکانی وڵاتەکەمان لێرە بە دروشمی (ناوی برایەتی، تورکیایە) بگەیێنینە گوێی هەمووان."
ئەمە لەکاتێکدایە ئەمڕۆ چوارشەممە 20-8-2025 لیژنەی پاڵپشتیی نیشتمانی، برایەتی و دیموکراسی پێنجەمین کۆبوونەوەی خۆی ئەنجام دەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ