هەڵەیەک روویدا! دووبارە هەوڵبدە
رووداو دیجیتاڵ
ئاکپارتی، لەدوای دەستلەکارکێشانەوەی ژمارەیەک لە بەرپرسانی، راگەیێندراوێکی بڵاوکردەوە و ئاماژەی بەوەکردووە، سەرۆکی رێکخستنەکانی پارتەکەی لە 8 پارێزگادا گۆڕیون و بەمزووانە دەستبەکار دەبن.
لە راگەیێندراوێکدا کە ئێوارەی شەممە 20-9-2025 بڵاویکردەوە، ئاكپارتی ئاماژەی کردووە، دوای کۆنگرە، بە ئامانجی بەرزکردنەوەی جموجووڵی سیاسیی پارتەکە لە شارەکاندا، هەروەها وەک ئەنجامی هەڵسەنگاندن و بەدواداچوون، گۆڕانکاری لە پۆستی سەرۆکی رێکخستنەکانی 8 پارێزگا کراوە.
ئەو سەرۆک رێکخستانەی ئاکپارتی گۆڕیونی، چواریان لە پارێزگاکانی سەمسوور، دێرسم، خارپێت و بەدلیسی باکووری کوردستانن و چواریان لە موغڵا، چانککالێ، نیغدە و ئۆردوی تورکیان. پارتەکە دەڵێت، لە چەند رۆژی داهاتوودا دەست بەکاردەبن.
ئاکپارتی جەختی کردووەتەوە، لە ماوەی رابردوودا کار و چالاکییەکانی رێکخستنەکانیان لەو 8 پارێزگایەدا بەگوێرەی پێویستی نەبووە.
پارتەکە لە بەشێکی راگەیێندراوەکەیدا دەڵێت: "ئەم گۆڕانکارییانە لە ئەرکەکاندا لەو سۆنگەیەوە دەکرێن کە ئاكپارتی تەنیا پارتێکی سیاسی نییە. بەڵکو خێزانێکی هاودۆزە و ئەندامانی بەیەکەوە خەبات دەکەن. ئەو جۆرە گۆڕانکارییانە نەریتێکی ئاکپارتییە کە لەڕێیەوە برایەتی نێوانمان و وزەی کارەکانمان بەرزتر دەبنەوە".
لە ماوەی دوو رۆژدا 5 بەرپرسی ئاکپارتی دەستیان لەکارکێشایەوە.
ئەو دەستلەکارکێشانەوەیەی رێکخستنەکانی ئاکپارتی بووەتە یەکێک لە بابەتە سەرەکییەکانی رۆژەڤی سیاسی.
سەرەتا هالوک لاچین، سەرۆکی لقی رێکخستنەکانی موغڵا و شەڕەفەدین یڵدرم، سەرۆکی لقی رێکخستنەکانی خارپێت دەستلەکارکێشانەوەی خۆیان راگەیاند. دواتریش سێ سەرۆکی دیکەی لقی رێکخستنەکان بە هەمان شێوە وازیان لە پۆستەکانیان هێنا.
ئاکپارتی
پارتی داد و گەشەپێدان (ئاکپارتی) رۆژی 14-8-2001 لەلایەن رەجەب تەیب ئەردۆغان و هاوڕێکانییەوە دامەزرا.
ئاکپارتی لەوەتەی دامەزرانییەوە تاوەکو ئێستا جڵەوی دەسەڵاتی لەدەستە و لە هەموو هەڵبژاردنە پەرلەمانییەکاندا پلەی یەکەمی پارتە سیاسییەکانی تورکیای بەدەستهێناوە.
ئەو پارتە ئێستا لە کۆی 600 کورسیی پەرلەمان ، 272 کورسیی هەیە و گەورەترین فراکسیۆنی پەرلەمانی تورکیایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ