هەڵەیەک روویدا! دووبارە هەوڵبدە
رووداو دیجیتاڵ
لە کۆی 24 بەربژێری پارتی کرێکاری تورکیا - تیپ، تەنیا دوو بەربژێری دەکەونە باکووری کوردستان؛ لە ئیزمیر چوار و لە ئیستەنبووڵیش دوو بەربژێری هەیە.
پارتی کرێکاری تورکیا - تیپ، کە لە هەڵبژاردنە پەرلەمانییەکەی پار هاوپەیمانیی دەم پارتی (یەسەپە) بوو، بۆ هەڵبژاردنی ئەمجارەی شارەوانییەکانی باکووری کوردستان و تورکیا، کە بڕیارە 31-03-2024 بەڕێوەبچێت، بە جیا بەشداری دەکات و تاوەکو ئێستا 24 بەربژێری بۆ شارەوانییە جیاوازەکان راگەیاندووە.
ئەو بەربژێرانەی پارتی کرێکاری تورکیا رایگەیاندوون، 22یان دەکەونە شارەکانی تورکیا و تەنیا دوو لەو بەربژێرانە لە باکووری کوردستانن، کە بریتین لە شارۆچکەی داماڵ لە ئەردەخان و شارۆچکەی چاغڵایان لە ئەرزنجان.
پارتی کرێکاری تورکیا لە هەندێک پارێزگادا زیاتر لە بەربژێرێکی هەیە؛ لە ئیستەنبووڵ دوو بەربژێری هەیە، هەروەها لە بازنەکانی باکڕکۆی و شیشلی بەربژێری هەیە. لە پارێزگای هاتای کە زۆرترین دەنگدەری لەو پارێزگایەدا هەیە، دوو بەربژێری لە شارۆچکەکانی ئارسوز و سامانداغ راگەیاندووە.
پارتی کرێکاری تورکیا زۆرترین بەربژێری لە پارێزگای ئیزمیر راگەیاندووە، لە شارۆچکەکانی باڵچۆڤا، فۆچا، کارابورون و کیراز بەربژێری شارەوانیی راگەیاندووە.
لە دوایین هەڵبژاردنی پەرلەمانیی تورکیا کە رۆژی 14-05-2023 بەڕێوەچوو، پارتی کرێکاری تورکیا لە چوارچێوەی هاوپەیمانیی رەنج و ئازادییەکان بەشداربوو، کە هەدەپە رابەرایەتیی کرد. ئەو هاوپەیمانییە 10.5%ی دەنگەکانی بردەوە، کە 65 کورسی بوو. پارتی کرێکاریی تورکیا رێژەی 1.73%ی دەنگەکانی بردەوە، کورسییەکی لە هاتای و سێ کورسیشی لە ئیستەنبووڵ بردەوە و بە چوار کورسییەوە چووە پەرلەمان.
پارتی کرێکاری تورکیا (TIP) رۆژی 07-11-2017 بە سەرۆکایەتیی ئەرکان باش، کە ئێستا سەرۆکی گشتییە، دامەزراوە.
لە تورکیا و باکووری کوردستان 30 گەورە شارەوانی، 51 شارەوانیی شارەکان و زیاتر لە 1000 شارەوانی شارۆچکەکان هەن؛ 20 هەزار و 745 ئەندامی ئەنجوومەنی شارەوانییەکان و هەزار و 272 ئەنجوومەنی گشتیی شارەکان هەن؛ هەروەها 50 هەزار و 229 موختار هەڵدەبژێردرێن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ