رووداو دیجیتاڵ
بەپێی نوێترین ئامارەکانی دەستەی ئاماری تورکیا (TÜİK) بۆ ساڵی 2025، رێژەی هاوسەرگیری لە باکووری کوردستان و تورکیا کەمیکردووە و لە بەرامبەردا جیابوونەوە زیادیکردووە. لەسەر ئاستی سەرجەم پارێزگاکانیش، دێرسم لە باکووری کوردستان کەمترین رێژەی هاوسەرگیری تێدا تۆمارکراوە، دانیشتووانی شارەکەش هۆکارەکەی بۆ قەیرانی ئابووری و بێکاری دەگەڕێننەوە.
بەگوێرەی داتاکانی دەستەی ئاماری تورکیا، تێکڕای رێژەی هاوسەرگیری لە پارێزگای دێرسم تەنیا 4.18 بووە لە هەر هەزار کەسێکدا. بەم رێژەیەش، دێرسم لەسەر ئاستی تورکیا لە پلەی یەکەمدایە بۆ نزمترین رێژەی هاوسەرگیری، کە بە شێوەیەکی بەرچاو لە خوار تێکڕای گشتیی تورکیاوەیە.
هاووڵاتییانی شارەکە باس لەوە دەکەن، خراپیی دۆخی ئابووری، بێکاری و کۆچکردنی گەنجان بەرەو هەندەران، هۆکاری سەرەکیی ساردبوونەوەی گەنجانن لە پێکهێنانی ژیانی هاوسەری و هاوکات هۆکاری بەرزبوونەوەی رێژەی جیابوونەوەشن.
"تێچووی هاوسەرگیری زۆر گرانە"
نێرگز یەتکینەر، دانیشتوویەکی دێرسمە، بە تۆڕی میدیایی رووداوی راگەیاند: "بەڕاستی ئێستا لە تورکیا کێشەیەکی قووڵی ئابووری هەیە. هاوسەرگیری زۆر گرانە؛ کرێی هۆڵەکانی ئاهەنگگێڕان، کرێی خانوو، کڕینی کەلوپەلی نوێ و ئامێرە کارەباییەکانی ماڵەوە بە شێوەیەکی بەرچاو بەرزبووەتەوە."
نێرگز گوتیشی: "تەنانەت تێچووی ئارایشتگەکانیش زۆر گرانن. بە کورتی، هاوسەرگیری لەم سەردەمەدا بەڕاستی قورس بووە. ئەم دۆخە تەنیا لە دێرسم نییە، بەڵکو لە هەموو شوێنێکی تورکیایە. ئێستا ملیۆنان کەس دەستگیراندارن و چاوەڕێی باشبوونی دۆخی ئابوورین، تاوەکو ئەو دۆخەش باش نەبێت، هاوسەرگیری بۆ زۆر کەس ئەستەم دەبێت."
"بەبێ ماڵ و کار چۆن هاوسەرگیری بکەن؟"
سۆنگول ئۆزالپ، هاووڵاتییەکی دیکەی شارەکەیە، باس لەوە دەکات کە گەنجان بەهۆی نەبوونی توانای داراییەوە ناتوانن بچنە نێو پرۆسەکەوە، ئەو دەڵێت: "کاتێک گەنجێک دەیەوێت هاوسەرگیری بکات، ژنان داوای زێڕ، خانوو و کار دەکەن. کە ئەمانە نەبن، چۆن هاوسەرگیری بکەن؟ بۆیە ئەوانیش روو لە دەرەوەی وڵات دەکەن. کاتێک گەنجیش لە شارەکە نەما، بێگومان هاوسەرگیریش روونادات."
زوبەیدە دۆلەک، سەرنج دەخاتە سەر سەختیی بژێویی ژیان و بە رووداوی گوت: "پێشتر گەنجەکانمان زووتر هاوسەرگیرییان دەکرد، هەموومان هاوسەرگیریمان کردووە و منداڵمان هەیە. بەڵام ئێستا زۆربەی گەنجەکان جیادەبنەوە و خێزانەکانیان بەجێدەهێڵن، چونکە ناتوانن بژین و کار نییە. کاتێکیش دەڵێن 'دێرسمی'ین، هەر بە تەواوی کار دەستناکەوێت."
خدر مەرجان، هۆکارەکە بۆ بێکاری دەگەڕێنێتەوە و دەڵێت: "گەنجەکانمان سەڵتن و چاویان لە دەستی دایک و باوکیانە، چونکە بێکارن، بۆیە هاوسەرگیری ناکەن. لەم دۆخە سەختەی ژیاندا، حکومەت ئاوڕ لە گەنجان ناداتەوە و رۆژ بە رۆژیش بارودۆخەکە خراپتر دەبێت. بۆیە کەمتەرخەمییەکە لە گەنجاندا نییە، بەڵکو لە ئەستۆی ئەوانەدایە کە ئەم وڵاتە بەڕێوەدەبەن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ