ئەردۆغان: تکایەک لە برا کوردەکانم دەکەم

 

 

ئەردۆغان هەروەها باسی ئەو ناوچانەی سووریای کرد کە بە نەوت دەوڵەمەندن، بەتایبەتی دێرەزوور کە لە چەند ساڵی رابردوودا لەژێر دەسەڵاتی بەڕێوەبەرایەتیی خۆسەر بوون و ئێستا کەوتوونەتەوە ژێر دەسەڵاتی دیمەشق و پاشان ئاماژەی بەوەش کرد، دەبێ یەک دەسەڵات و یەک هێز لە هەموو سووریادا هەبێ و گوتی، "دەوڵەت لەنێو دەوڵەت نابێت. هێزی جیای چەکداری لەنێو دەوڵەت نابێت. سوپای هاوتەریب نابێ. بەتایبەتی داوا لە براکوردەکانم دەکەم، نەخزێنە نێو ئەو یارییانەی برایەتیی دێرین و هەمیشەیی ئێمە دەکەنە ئامانج و دووبەرەکی دەخەنە نێوانمان."

 

ئەردۆغان هەروەها گوتی، "وەڵامی داواکاریی کۆمەکی مرۆیی برا کوردەکانی ئەودیو سنوور، بە هاوئاهەنگی لەگەڵ حکومەتی سووریا دەدەینەوە. ئافاد، مانگی سوور و رێکخراوە مرۆییەکانی دیکەمان دەستی هاوکاری بۆ ئەو خەڵکەی باکووری سووریا درێژ دەکەن کە شایستەن."

 

سەرۆککۆماری تورکیا رەخنەی لە بەرپرسانی باڵای هەسەدە گرت و بەوە تۆمەتباری کردن کە چەند جارێک پابەندی ئاگربەست نەبوون و پاشانیش داوای کرد ئەو "جۆرە هەڵەیە" دووبارە نەبێتەوە.

 

ئەم گوتەیە لە کاتێکدایە، بەرپرسانی هەسەدە چەندینجار رایانگەیاندووە، حکومەتی سووریا پشت لە رێککەوتنەکان دەکات و پابەندی ئاگربەستیش نابێت.

 

ئەردۆغان گوتی، ئەحمەد شەرع، سەرۆککۆماری سووریا بە هەستیارییەوە کار دەکات بۆ ئەوەی شەڕ کۆتایی بێت و ئاشتی بەدی بێت.