رووداو دیجیتاڵ
دامەزراوەی ئاماری تورکیا دەڵێ، لە مانگی تەممووزی ئەم ساڵدا رێژەی بێکاری بەراورد بە مانگی حوزەیرانی رابردوو 0.4 خاڵ کەمیکردووە و بۆ 8٪ دابەزیوە.
دامەزراوەکە ئەمڕۆ هەینی 29ی ئابی 2025 داتاکانی پەیوەست بە بێکاریی لە تورکیا و باکووری کوردستان بۆ مانگی تەممووزی 2025 بڵاوکردەوە.
بەگوێرەی داتاکان، ژمارەی بێکاران لە تەمەنی 15 ساڵ و سەرووتر لە مانگی تەممووزدا بەراورد بە مانگی پێشوو 164 هەزار کەس کەمیکردووە و بووەتە دوو ملیۆن و 828 هەزار کەس. هەروەها رێژەی بێکاری لەنێو پیاواندا 6.5٪ و لەنێو ژنانیشدا 10.9٪ خەمڵێنراوە.
ژمارەی دامەزراوان لە مانگی تەممووزدا بەراورد بە مانگی پێشوو 18 هەزار کەس زیادیکردووە و گەیشتووەتە 32 ملیۆن و 582 هەزار کەس، رێژەی دامەزراندنیش لە هەمان ئاستدا ماوەتەوە و 49.1٪ بووە. ئەم رێژەیە لە پیاواندا 66.1٪ و لە ژناندا 32.4٪ بووە.
هێزی کار لە مانگی تەممووزدا بەراورد بە مانگی پێشوو 146 هەزار کەس کەمیکردووە و گەیشتووەتە 35 ملیۆن و 410 هەزار کەس، رێژەی بەشداری لە هێزی کاریش 0.3 خاڵ دابەزیوە و بووەتە 53.3٪. رێژەی بەشداری لە هێزی کاردا لە پیاواندا 70.6٪ و لە ژناندا 36.4٪ بووە.
لەنێو گەنجانی تەمەن 15-24 ساڵ، رێژەی بێکاری بەراورد بە مانگی پێشوو 0.9 خاڵ دابەزیوە و بووەتە 15٪. لەو گرووپە تەمەنەدا رێژەی بێکاری؛ لە پیاواندا بە 11.3٪ و لە ژناندا بە 21.7٪ خەمڵێنراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ