دوو مانگی بڤە بۆ ئێران

1) هەم خودی ترەمپ و هەم بەرپرسانی باڵای ئیدارەكەی وزە و تێچووی مادیی و مەعنەوی زۆریان بۆ سیاسەتی ئەوپەڕی گوشار دژ بە ئێران سەرفكردووە و لەوانەیە پێیان قبووڵ نەكرێت ئیدارەی بایدن وەک بەڵێنی داوە هەروا سووك و ئاسان هەموو ئەو هەوڵانە لەباربەرێت و بگەڕێتەوە نێو رێككەوتنی ئەتۆمی. بۆ ئەم مەبەستەش لێدانی زەبرێكی بچووک و سنوورداری سەربازی لە ئێران دەتوانێت نەک هەر كارەكە بۆ بایدن دژوار بكات، بەڵكو لەوانەیە رێككەوتنێكی شیمانەیی نوێ لەگەڵ ئیدارەی نوێی ئەمریكا بۆ هەمیشە لە بەرنامەی كاری كۆماری ئیسلامیی ئێران بسڕێتەوە.

 

2) ئاژانسی نێودەوڵەتیی وزەی ئەتۆم چەند رۆژێک پێش ئێستا رایگەیاند رێژەی یورانیۆمی پیتێندراوی ئێران گەیشتووەتە 2444 كیلۆگرام و ئەمەش 12 هێندەی رێژەی رێگەپێدراوی رێككەوتنی پێنج كۆ یەكە. ئاژانس هەروەها راشیگەیاند ئێران لە بنكەی ژێرزەمینیی نەتەنزدا گازی "هێگزافلۆڕایدی یۆرانیۆم" ی كردووەتە نێو سانتریفیوجە پیشكەوتووەكانیەوە، ئەمەش نەک هەر پێچەوانەی رێككەوتنی ئەتۆمییە، بەڵكو بە پێودانگ، زۆر زیاترە لەوەی بگوترێت بۆ كاری زانستی و لیكۆڵینەوەییە و تەنیا و تەنیا دەتوانێت نیازێكی سەربازیی لەپشتەوە بێت. ئەم خاڵەش لەوانەیە ترەمپ بگەیێنێتە ئەو باوەڕەی كاتێكی ئەوتۆ بۆ رێگری لە دەستڕاگەیشتنی ئێران بە چەكی ئەتۆمی یان یورانیۆمی پێویست بۆ چەكی ئەتۆمی لەبەردەست ئەمریكادا نییە و ئیدارەی داهاتووی ئەمریكاش تا بێت و دامەزرێت و خوێندنەوە بۆ دۆخەكە بكات فریای ئەوە ناكەوێت. كەوابوو ئەگەری زۆرە ئیدارەی ترەمپ بێهەڵوێستی بە كات بەفیڕۆدان لەقەڵەم بدات و بیەوێ خۆی هەستێت بە كارێكی لەوشێوەیە. دەروونناسیی ترەمپ پێماندەڵێ زۆر پێیخۆشە لەمێژوودا بەو سەرۆكە ناوی ببرێت كە رێگەی نەدا ئێران ببێتە خاوەن چەكی ئەتۆمی. هەرچەند لەوانەیە شتێكی رۆتین بێت، بەڵام دەبێ ئەوەشمان لەبەرچاوبێت كە ترەمپ لە كۆبوونەوەی پێنجشەممەی رابردوودا پرسیاری ئەگەر و ئاستەنگەكانی لێدانی سەربازی و سایبەریی بنكەی ئەتۆمیی نەتەنزی كردبوو. هەروەها بەپەلەشە كە كەشتیی فڕۆكەهەڵگری "USS نیمیتز" هەرچی زووە ناڤی حەوتەمی هێزی دەریایی ئەمریكا بەجێبهێڵێت و لە مانۆڕی هاوبەشی سەربازی لەگەڵ هند و ژاپۆن بگەڕێتەوە بۆ كەنداو، ئەمەش سەرەڕای ناردنی فڕۆكەی بۆمبهاویژی B52 بۆ كەنداو.

 

3) ترەمپ رایگەیاندووە كە دۆڕاوێكی باش نییە و دۆڕانی پێ‌ قورسە. لەوانەیە لەدوایین رۆژەكانی ئیدارەكەیدا بۆ پەردەپۆشكردنی دۆڕانی خۆی و بەلاڕێدابردنی رای گشتی ئەمریكا پەنا بۆ گێچەڵێكی تازە ببات و وەهاش سەرنج لە رادەستكردنی دەسەڵات و چۆڵكردنی كۆشكی سپی لادەچێت و دەخرێتەسەر ئەو گێچەڵە تازەیە.

 

4) لەڕێگا درەنگكەوتووە و لەئاش پەلە دەكات

 

ترەمپ كە چاوەڕوانی بارێكی قورسی لەناكاوی وەک كۆرۆنای نەدەكرد، كورد گوتەنی لە گوێی گادا نووستبوو و هێندە لە هەڵبژێردرانەوەی دووبارەی خۆی دڵنیابوو كە یەكلاییكردنەوەی كێشەكانی ئەمریكا و ئێرانی دانابوو بۆ خولی دووەمی خۆی. تەنانەت جەواد زەریف وەزیری دەرەوەی ئێران، بەر لە هاتنی كۆرۆنا رایگەیاند پێداچوونەكانی ئێمە پێمان دەڵێت ترەمپ خولی داهاتووش سەرۆكی ئەمریكا دەبێت. بەڵام ئێستا كە ترەمپ تاڕادەیەكی زۆر دڵنیابووەتەوە لانیكەم لەم چوارساڵەی داهاتوودا سوكانی كۆشكی سپی بەدەستەوە نابێت، حەزێکی زۆر تووند و سەركێشی هەیە وابكات لانیكەم كۆرپەكەی زەریف و وندی شێرمەن كە بریتیە لە گەڕانەوەی ئەمریكا بۆ رێككەوتنی ئەتۆمی، لە نەخۆشخانەکەی بایدندا بە مردوویی لەدایک ببێت.