رووداو دیجیتال
هەڵبژاردەی وڵاتە یەکگرتووەکانی ئەمریکا، نازناوی یەکەم وەشانی خولی نەتەوەکانی کۆنکاکافی بەدەستهێنا، دوای ئەوەی لە یاریی کۆتاییدا 3 - 2 لە مەکسیکی بردەوە.
بەرەبەیانی ئەمڕۆ، یاریی کۆتایی خولی نەتەوەکانی کۆنکاکاف لەسەر یاریگەی برۆنكۆس ئات مايل های لە شاری دێنڤێر لە ویلایەتی کۆلۆرادۆی ئەمریکی، لەنێوان ئەمریکا و مەکسیک بەڕێوەچوو.
خۆسێ کۆرۆنا خولەکێک دوای دەستپێکردنی یارییەکە گۆڵی پێشکەوتنی بۆ مەکسیک بەدەستهێنا.
جیۆڤانی ریێنا لە خولەکی 27 گۆڵی یەکسانبوونی بۆ خاوەن ماڵ بەدەستهێنا و نیوەی یەکەم بەیەکسانبوونی هەردوولا بە گۆڵێک کۆتاییهات.
لە نیوەی دووەمدا هەردوولا چەندینجار هێرشیان بردە سەر گۆڵی یەکدی و لە خولەکی 79ـدا دیگۆ لانز جارێکی دیکە مەکسیکی پێشخستەوە، بەڵام وێستۆن ماکێنیی یاریزانی یانەی یوڤێنتوس دوای تەنیا 3 خولەک گۆڵی یەکسانبوونی بۆ ئەمریکا تۆمارکرد.
یارییەکە گەیشتە دوو گێمی زیادکراو، بەڵام کریستیان پۆلیسیچی یاریزانی یانەی چێڵسی نەیهێشت یارییەکە بگاتە لێدانەکانی یەکلاکەرەوە، کاتێک لە خولەکی 114 گۆڵی سێیەم و بردنەوەی بۆ هەڵبژاردەی ئەمریکا تۆمارکرد و نازناوی یەکەم پاڵەوانێتی خولی نەتەوەکانی کۆنکاکافی بە ئەمریکا بەخشی.
هەڵبژاردەی هندۆراسیش بووە سێیەمی پاڵەوانێتییەکە، دوای ئەوەی لە یاریی دیاریکردنی پلەی سێیەمدا بە لێدانەکانی یەکلاکەرەوە 5 - 4 لە هەڵبژاردەی کۆستاریکای بردەوە، پاش ئەوەی ئەنجامی یارییەکە بە یەکسانبوونی هەردوولا بە ئەنجامی 2 - 2 کۆتاییهات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ