ریال مەدرید
رووداو دیجیتاڵ
یانەی پاریس سانجێرمانی فەرەنسی بردنەوەیەکی مێژوویی بەرامبەر یانەی ریال مەدریدی ئیسپانی تۆمارکرد و خۆی گەیاندە یاریی کۆتایی مۆندیالی یانەکان.
لە دووەم یاریی قۆناخی پێشکۆتایی مۆندیالی یانەکاندا، هەردوو یانە لە نیوجێرسی لەسەر یاریگەی مێتلایف رووبەڕووی یەکبوونەوە، پاریس سانجێرمان بە ئاستێکی زۆر بەرزەوە دەرکەوت و بە چوار گۆڵی بێبەرامبەر سەرکەوتنی بەرامبەر یانەی ریال مەدرید بەدەستهێنا.
دوای تەنیا 6 خولەک، راول ئاسێنسیۆ هەڵەیەکی زۆر گەورەی کرد و فابیان رۆیز گۆڵی پێشکەوتنی بۆ پاریس سانجێرمان تۆمارکرد.
دوای دوو خولەک عوسمان دێمبێلی سوودی لە هەڵەیەکی دیکەی بەرگریی ریال مەدرید کرد، ئەمجارە رۆدیگێر کەوتە هەڵەوە و ئەستێرە فەرەنسییەکە بۆ جاری دووەم تۆڕی گۆڵی یانەی ریال مەدریدی هەژاند.
لە خولەکی 24 فابیان رۆیز بۆ جاری سێیەم تۆڕی تیبۆ کۆرتوای هەژاند و گۆڵی دووەمی خۆی لە یارییەکەدا تۆمارکرد.
نیوەی یەکەمی یارییەکە بە سێ گۆڵی بێبەرامبەر لە بەرژەوەندی فەرەنسییەکان کۆتاییهات.
لە خولەکی 87 گۆنچالۆ رامۆس گۆڵی چوارەمی بۆ پاریس سانجێرمان تۆمارکرد و لەسەر شێوازی دیۆگۆ جۆتا ئاهەنگی گێرا.
پاریس سانجێرمان بردنەوەیەکی مێژوویی بە چوار گۆڵی بێبەرامبەر تۆمارکرد، ریال مەدریدی لە جامی جیهانی یانەکان کردە دەرەوە و خۆی گەیاندە یاریی کۆتایی پاڵەوانێتییەکە.
لە یاریی کۆتایی مۆندیالی یانەکاندا، رۆژی یەکشەممە کاژێر 22:00 یانەی پاریس سانجێرمان رووبەڕووی یانەی چێڵسی دەبێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ