ئەمڕۆ بۆ بوندێسلیگا رۆژێکی ئاگرین و مێژووییە

 

 

یارییەکانی وەرزی 2024-2025ـی بوندێسلیگای ئەڵمانیا کۆتاییدێن، یانەی بایرن میونشن نازناوەکەی لە بەرژەوەندی خۆی یەکلاکردووەتەوە، بەڵام رکابەریکردن لەسەر گەیشتن بە چامپیۆنزلیگ و مانەوەی یانەکان لە خولەکەدا لە لووتکەدا دەبێت.

 

سەرجەم یارییەکانی گەڕی 34 و کۆتایی خولەکە کاژێر 16:30 بەڕێوەدەچن، یاریی لووتکەی ئەم گەڕەی خولەکە لەنێوان هەردوو یانەی ئینتراخت فرانکفۆرت و فرایبۆرگ دەبێت، هەردوو یانە رکابەری لەسەر گەیشتن بە چامپیۆنزلیگی وەرزی داهاتوو دەکەن، ئینتراخت 57 خاڵی هەیە و لە پلەی سێیەمە، فرایبۆرگ بە 55 خاڵ لە پلەی چوارەمی ریزبەندە و هەر کامێکیان یارییەکەی ئەمڕۆیان بباتەوە راستەوخۆ دەگاتە چامپیۆنزلیگی وەرزی داهاتوو، بۆ ئەوەی هەردوو یانە بەیەکەوە سەربکەون، پێویستە بۆرووسیا دۆرتموند یارییەکەی بدۆڕێنێت.

 

ئینتراخت فرانکفۆرت بەبردنەوە و یەکسانبوون راستەوخۆ دەگاتە خولی یانە پاڵەوانەکانی ئەورووپا، بە دۆڕان لە یارییەکەدا و دۆڕانی دۆرتموند بەرامبەر هۆڵشتاین کیل، یانەکە هەر دەگاتە چامپیۆنزلیگ.

 

یانەی فرایبۆرگ بەبردنەوەی و یەکسانبوو، لەگەڵ دۆڕانی دۆرتموند دەگاتە چامپیۆنزلیگ، ئەگەر یارییەکە بباتە راستەوخۆ سەردەکەوێت.

 

یانەی بۆرووسیا دۆرتموند بەبردنەوەی یارییەکە و یەکسانبوونی ئینتراخت و فرایبۆرگ دەگاتە چامپیۆنزلیگ، یان فرایبۆرگ یارییەکە بدۆڕێنێت و دۆرتموند بیباتەوە یانەکە راستەوخۆ دەگاتە چامپیۆنزلیگ.

 

یانەی ماینز کە ئێستا لە پلەی شەشەمی ریزبەندی خولی ئەڵمانیایە، چاوی لە گەیشتنە بە پاڵەوانێتییەکی ئەورووپییە، ماینز بەرامبەر بایرلیڤەرکوزن یاریی دەکات، ئەگەر دۆرتموند بدۆڕێنێت و ئەوان بە جیاوازییەکی زۆر بیبەنەوە، رکابەرییەکەیان لەسەر گەیشتن بە یۆرۆپالیگ دەبێت، بەبردنەوە و یەکسانبوون یانەکە دەگاتە کۆنفرانسلیگ، بەمەرجێک لایپزیگ یارییەکەی بەرامبەر شتوتگارت بدۆڕێنێت، یانەی لایپزیگ بۆ ئەوەی بگاتە یۆرۆپالیگ پێویستە یارییەکەی بە جیاوازییەکی زۆر بباتەوە، ماینز و دۆرتموند یارییەکانیان بدۆڕێنن.

 

بۆ ئەوەی یانەکە بگاتە کۆنفرانسلیگ پێویستە یانەکە یارییەکەی بباتەوە و ماینز بدۆڕێنێت.

 

لە لایەکی دیکەوە و لە پلەکانی کۆتایی ریزبەندی خولەکە، رکابەرییەکی بەهێز هەیە، هەردوو یانەی بوخۆم و هۆڵشتاین کیل بۆ خولی پلە دوو دابەزیوون، یانەکانی سانت پاوڵی، هۆفێنهایم و هێدینهایم رکابەری دەکەن بۆ ئەوەی بۆ وەرزی داهاتوو لە خولەکەدا بمێننەوە.

 

یانەی سانت پاوڵی 32 خاڵی هەیە و لە پلەی چواردەیەمە، یاریی ئەمڕۆیان بەرامبەر بوخۆم یاریی دەکات.

 

یانەی هۆفێنهایم بە 32 خاڵ لە پلەی پازدەیەمە و یارییەکەیان بەرامبەر بایرن میونشنە لە یاریگەی خۆیدا.

 

یانەی هێدنهایم بە 29 خاڵ لە پلەی شازدەیەمی ریزبەندی خولەکە یاریی ئەمڕۆیان بەرامبەر یانەی ڤێردێر برێمەنە.

 

 

هۆفێنهایم - بایرن میونشن 16:30

ماینز - بایرلیڤەرکوزن 16:30

فرایبۆرگ - ئینتراخت فرانکفۆرت 16:30

دۆرتموند - هۆڵشتاین کیل 16:30

ئوگسبۆرگ - یونیەن بەرلین 16:30

بۆرووسیا مۆنشنگلادباخ - فۆڵڤسبۆرگ 16:30

سانت پاوڵی - بوخۆم 16:30

هێدنهایم - ڤێردێر برێمەن 16:30

لایپزیگ - شتوتگارت 16:30

 

ئەمڕۆ بۆ خولی تۆپی پێی ئەڵمانیا رۆژێکی تایبەتە، دوو رووداوی سەرنجڕاکێش و گرنگ روودەدەن، تۆماس مولەر، ئەستێرەی بەنێوبانگی ئەڵمانیا و یانەی بایرن میونشن دوای 25 ساڵ یارییکردن لەسەر ئاستی لاوان و تیپی یەکەمی یانەی بایرن میونشن و بردنەوەی 34 نازناوی جیاواز، ئەمڕۆ ماڵئاوایی لە یانە باڤارییەکە دەکات.

 

لەلایەکی دیکەوە یانەی بایرلیڤەرکوزن دوایین یاریی خۆی لەژێر سەرپەرشتی چابی ئەلۆنسۆ ئەنجامدەدات و ئەو راهێنەر ماڵئاوایی لە یانەکە دەکات.

 

ئەلۆنسۆ لە 2022ـەوە راهێنەرایەتی بایرلیڤەرکوزن دەکات، لەگەڵ ئەو یانەیەدا ئەنجامی باشی بەدەستهێنا و وەرزی رابردوو یانەکەی کردە پاڵەوانی بوندێسلیگا، جامی ئەڵمانیا و سوپەری ئەڵمانیای بۆ یانەکە بردەوە و پلەی دووەمی یۆرۆپالیگی بەدەستهێنا.

 

ئەلۆنسۆ هێشتا گرێبەستەکەی رانەگەیێنراوە، بەڵام هەموو ئاماژەکان بۆ ئەوەن کە دەبێتە راهێنەری داهاتووی ریال مەدرید.