لەسەر یارییەکی تۆپی پێ، ژنێک بە چەقۆ لە هاوژینەکەی دەدات

 

 

لە خولی ئیتاڵیا هەردوو یانەی ناپۆلی و ئاتالانتا رووبەڕووی یەکبوونەوە، هەردوو هاوژینەکە لە ماڵەوە سەیری یارییەکەیان دەکرد، لە یارییەکەدا ناوبژیوان دەگەڕێتەوە بۆ ڤار و لێدانێکی سزای یانەی ناپۆلی رەتدەکاتەوە، لەو کاتەدا پیاوەکەی هاوار دەکات و جنێو بە تەلەڤزیۆنەکە دەدات و لە ئاستی تیپەکەی و بڕیارەکانی ناوبژیوان تووڕە دەبێت، بەمەش هاوژینەکە بەو شێوەیە تێدەگات کە جنێوەکانی بۆ ئەوە و دەمەقاڵێیەکی تووند لەنێوانیاندا دروستدەبێت، دوای ئەوەش ژنەکە بە چەقۆ لە پیاوەکەی دەدات و برینداری دەکات.

 

پۆلیسی ئیتاڵیا دەڵێت "ژنەکە هاوژینەکەی بەوە تۆمەتبارکردووە کە سوکایەتی پێ دەکات و داوایکردووە لە ژوورەکە بچێتە دەرەوە، بەڵام هاوژینەکەی ئەمەی رەتکردووەتەوە و بەمەش ژنەکە هەڕەشەی لێکردووە و هێرشی کردووەتە سەری سەرەتا مەقەستێکی تێگرتووە، بەڵام بەرینەکەوتووە، دوای ئەوە ژنەکەی چووەتە چێشتخانە و چەقۆیەکی هێناوە و هێرشی کردووەتە سەر مێردەکەی و برینداری کردووە."

 

لەو کاتەدا پیاوەکەی ویستوویەتی بەرگری لە خۆی بکات و پەیوەندی بە فریاکەوتنەوە بکات، بەڵام ژنەکەی هەر بەردەوامبووە لە هێرشکردنە سەری، تاوەکو پۆلیس گەیشتووەتە شوێنەکە و دۆخەکەی کۆنتڕۆڵکردووە.

 

پیاوەکە تەمەنی 40 ساڵە و گواستراوەتەوە بۆ نەخۆشخانە، ژنەکە 35 ساڵە و بە چەند تۆمەتێک دەستگیرکراوە، لەوانە توندوتیژی خێزانی، هێرشی مەترسیدار و هەڵگرتنی چەقۆ بە نایاسایی.

 

پیاوەکە لە نەخۆشخانە لەژێر چاودێری پزیشکی، بەڵام دۆخی تەندروستیی مەترسیدار نییە.