رووداو دیجیتاڵ
لەکاتێکدا ساڵی 2025بەرەو کۆتایی هەنگاو دەنێت، چاوی هەموو جیهان لەسەر پڕبایەخترین و سەرنجڕاکێشترین 'سەمای کۆتاییە' لە مێژووی تۆپی پێدا. بۆ کریستیانو رۆناڵدۆی ئەفسانەی پۆرتوگال، ساڵی 2026 تەنیا ژمارەیەک نابێت لە رۆژژمێرەکەیدا، بەڵکو ساڵی یەکلاکردنەوەیە؛ کە ئایا دۆن وەک یەکێک لە باشترین یاریزانانی مێژووی تۆپی پێ دەتوانێت گەورەترین دەستکەوت لە جیهانی تۆپی پێدا بباتەوە یان نا..
لێرەدا شیکارییەک بۆ قورسترین 5 ئەرک دەخەینەڕوو کە چاوەڕێی دۆن دەکەن لە ئاڵۆزترین ساڵی ژیانیدا:
1 - مۆندیالی 2026.. دوایین هەوڵ بۆ کردنەوەی گرێکوێرەکە
باڵاترین ئامانجی ئێستای رۆناڵدۆ، بەشداریکردنە لە جامی جیهانی بۆ جاری شەشەم لە مێژوویدا، ئەمەش ریکۆردێکی مێژووییە کە پێشتر هیچ یاریزانێک پێی نەگەیشتووە. کریستیانۆ باش دەزانێت مۆندیالی ئەمریکا، کەنەدا و مەکسیک، دوایین چانسیەتی بۆ بەرزکردنەوەی جامە زێڕینەکە؛ تاقە نازناوە کە لە خەزێنە پڕبایەخەکەیدا ونە. ئاڵنگارییەکە لێرەدا تەنیا بەشداریکردن نییە، بەڵکو گەیاندنی پۆرتوگالە بە سەکۆی نازناوەکە لە 19ـی تەممووزی 2026ـدا.
2 - یاریکردن لە تەمەنی 41 ساڵیدا
لە شوباتی 2026، رۆناڵدۆ تەمەنی دەبێتە41 ساڵ. لەڕووی مێژووییەوە، هیچ هێرشبەرێک لەم تەمەنەدا نەیتوانیوە رۆڵێکی سەرەکی لە پاڵەوانێتییەکی گەورەی وەک مۆندیالدا بگێڕێت. ئەرکی سەرەکی ئەو، پاراستنی توانای جەستەیی و دوورکەوتنەوەیە لە پێکان. رۆناڵدۆ ئێستا لە جەنگێکی راستەوخۆدایە لەگەڵ کات؛ دەیەوێت بیسەلمێنێت کە 'تەمەن تەنیا ژمارەیە' تەنیا دروشمێکی ریکلامی نییە، بەڵکو راستییەکی سەلمێنراوە کە لەڕێگەی پابەندییەکی سەخت و سیستمێکی خۆراکیی پەرجۆئاساوە بەدەستهاتووە.
3 - گەیشتن بە 1000 گۆڵ.. ژمارە مەحاڵەکە
لە کۆتایی ساڵی 2025، رۆناڵدۆ بەربەستی 950 گۆڵی فەرمی بڕی. گەیشتن بە گۆڵی ژمارە 1000 لە ساڵی 2026، ئەو ئەرکە ئەستەمەیە کە ئەفسانەکە وەک ئامانجی سەرەکی داناوە. کریستیانۆ پێویستی بەڕێژەیەکی زۆری گۆڵکردن هەیە لەگەڵ یانەی نەسڕ و هەڵبژاردەی وڵاتەکەی بۆ ئەوەی پێش وازهێنانی بگاتە ئەم لووتکە مێژووییە.
ئەم گۆشارە لەوانەیە ببێتە چەکێکی دووسەر؛ هەم هاندەر بێت بۆی، هەمیش بارێکی سەختی دەروونی بێت بۆی، لەکاتێکدا تیپەکەی پێویستی بە یاریکردنی بە کۆمەڵ هەیە.
4 - شکۆمەندی لەگەڵ نەسڕ.. نازناوی خولی رۆشن و ئاسیا
پێش ئەوەی روو لە مۆندیال بکات، رۆناڵدۆ دەیەوێت وەرزەکەی لەگەڵ یانەی نەسڕی سعودی لەسەر سەکۆی نازناوەکان کۆتایی پێبهێنێت. دوای سەرکەوتنە گەورەکانی لە ئەورووپا، ئێستا چاوی لەوەیە مێژوویەک لە کیشوەری زەرد بنووسێتەوە، چ بەبردنەوەی خولی سعودی یان خولی یانە پاڵەوانەکانی ئاسیای 2. ئاڵنگارییەکە لێرەدا کێبڕکێی تووندی یانە گەورەکانی سعودیە و ئاسیایە، لەگەڵ ویستی ئەو بۆ سەلماندنی ئەوەی پڕۆژەکەی لە سعودیە تەنیا مادی نەبووە، بەڵکو وەرزشی و مێژووییش بووە.
5 - ساتەوەختی ماڵئاوایی.. وازهێنانی نێودەوڵەتی
هەڵبژاردنی کاتێکی گونجاو بۆ هەڵواسینی درێسی نیشتمانی، قورسترین بڕیاری دەروونییە. ئاماژەکان بۆ ئەوە دەچن کە 2026 وێستگەی کۆتایی رۆناڵدۆ بێت لەگەڵ پۆرتوگال. ئەرکەکە لێرەدا بەڕێوەبردنی ئەم ساتەوەختە هەستیارەیە بەزیرەکی، بەجۆرێک کە لە دەرگا گەورەکەوە بێتە دەرەوە، نەک بە دیمەنێکی خەمگین وەک ئەوەی لە مۆندیالی 2022 روویدا. ئاڵنگارییەکە ئەوەیە کە رۆناڵدۆ قبوڵی بکات رۆڵی 'سەرکردەی رێنیشاندەر' بگێڕێت ئەگەر پێویست بوو، نەک تەنیا گۆڵکاری سەرەکی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ