هەڵەیەک روویدا! دووبارە هەوڵبدە
رووداو دیجیتاڵ
لە دیمەشق وەزیری دەرەوەی سعودیە لەگەڵ هاوتا سوورییەکەی کۆبووەوە. دوای کۆبوونەوەکە کۆنگرەیەکی رۆژنامەڤانیان کرد و وەزیری دەرەوەی سعودیە گوتی، لە پێشەوەی وڵاتان دەبن بۆ هەوڵدان بۆ بنیاتنانەوەی سووریا دوای 14 ساڵ لە شەڕ و ئاڵۆزی.
رۆژی شەممە، 31ـی ئایاری 2025، فەیسەڵ بن فەرعان، وەزیری دەرەوەی سعودیە سەردانی دیمەشقی کرد و لەگەڵ ئەسعەد شەیبانی، وەزیری دەرەوەی سووریا کۆبووەوە.
دوای کۆبوونەوەکە وەزیری دەرەوەی سعودیە رایگەیاند، "دووپاتیدەکەینەوە کە سعودیە لە پێشەنگایەتی وڵاتان بۆ پاڵپشتیکردنی سووریا لە رێگەکەی بۆ بنیاتنانەوە و باشترکردنی ئابوورییەکەی دەمێنێتەوە". دەشڵێت، لەگەڵ قەتەر هاوکاری دارایی کەرتی گشتیی سووریا دەکەن.
وەزیری دەرەوەی سعودیە ئاماژەی بەوەش کرد، بەم زووانە شاندێکی ئابووری سعودیە سەردانی دیمەشق دەکات و گفتوگۆ لەبارەی هاوئاهەنگی بازرگانی، ئابووری و وەبەرهێنان دەکەن.
ئەسعەد شەیبانی، وەزیری دەرەوەی سووریا لە کۆنگرە رۆژنامەڤانییەکەدا رایگەیاند، سوپاسی سعودیە بۆ هەوڵەکانی بۆ هەڵگرتنی سزاکان لەلایەن ئەمریکاوە دەکەن. گوتیشی، هەردوو وڵات لە قۆناخێکی بەهێزی هاوئاهەنگی ئابووری و وەبەرهێنانی هاوبەشدان.
نێوەڕاستی ئەم مانگە، دۆناڵد ترەمپ، سەرۆکی ئەمریکا سەردانی سعودیەی کرد و لەوێ هەڵگرتنی سزاکانی سەر سووریای راگەیاند. دوای ئەمریکا، ژمارەیەک وڵاتی دیکەش، لەوانە ژاپۆن، بەشێکی سزاکانیان لەسەر سووریا هەڵگرت.
شەیبانی گوتیشی، "دەستپێشخەری ستراتیژی بۆ باشترکردنی ژێرخان، چاککردنی کەرتی کشتوکاڵ و دروستکردنی دەرفەتی کار بۆ سووریاییەکان" ئاماژەیەکی گرنگە بۆ باشترکردنی داهاتووی وڵاتەکەیان.
ساڵانێکی زۆری جەنگ و گەمارۆکان زیانێکی گەورەیان بە ئابووری، ژێرخان و پیشەسازیی وڵاتەکە گەیاندووە. راپۆرتێکی ئەم دواییەی پرۆگرامی گەشەپێدانی نەتەوە یەکگرتووەکان (UNDP) مەزەندەی کردووە کە "کۆی داهاتی ناوخۆی لەدەستچووی" سووریا لە 2011-2024 نزیکەی 800 ملیار دۆلار بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ