هەڵەیەک روویدا! دووبارە هەوڵبدە
رووداو دیجیتاڵ
وەزیرانی دەرەوەی وڵاتانی کۆمەڵەی حەوت پشتیوانی بێ مەرجی خۆیان بۆ هاوبەشەکانیان لە رۆژهەڵاتی ناوەڕاست راگەیاند و داوای راگرتنی دەستبەجێی هێرشەکانی ئێرانیان کرد. ئەوان هۆشداری دەدەن کە هێرشکردنە سەر ژێرخانی وزە و ئاسایشی دەریاوانی لە تەنگەی هورمز، هەڕەشەیەکی جدییە بۆ سەر ئاسایشی جیهانی.
رۆژی یەکشەممە، 22ی ئاداری 2026، وەزیرانی دەرەوەی وڵاتانی کەنەدا، فەرەنسا، ئەڵمانیا، ئیتاڵیا، ژاپۆن، بەریتانیا و ئەمریکا، لەگەڵ بەرپرسی باڵای سیاسەتی دەرەوەی یەکێتیی ئەورووپا، لە راگەیێندراوێکی هاوبەشدا رایانگەیاند، "ئێمە بە تووندترین شێوە هێرشە سەرکێشەکانی رژێمی ئێران بۆ سەر مەدەنییەکان و ژێرخانی وزە لە وڵاتانی بەحرین، کوێت، عومان، قەتەر، سعودیە، ئیمارات، ئوردن و عێراق سەرکۆنە دەکەین."
رۆژی 28ی شوبات، ئەمریکا و ئیسرائیل هێرشیانکردە سەر ئێران و ئەویش بە مووشەک و درۆن وەڵامیدانەوە. وەکو بەشێک لە وەڵامەکەی، تاران هێرشیکردووەتە سەر وڵاتانی کەنداو و لە رۆژی دووەمی جەنگەکەشەوە تەنگەی هورمزی داخستوووە.
بەگوێرەی بەدواداچوونی تۆڕی میدیایی رووداو، لە دەستپێکی جەنگی ئەمریکا و ئیسرائیلەوە لەگەڵ ئێران، هەرێمی کوردستان بە زیاتر لە 410 درۆن و مووشەک هێرشی کراوەتەسەر.
بەگوێرەی ئامارە کۆکراوەکە، زۆرینەی هێرشەکان بۆسەر هەولێر و دەوروبەری بوون کە 320 درۆن و مووشەک بوون، دواتر سلێمانی بە 85 درۆن و مووشەک، پاشان دهۆک بە شەش درۆن و پارێزگای هەڵەبجەش لە یەک هێرشدا دوو درۆن بۆسەری بەکارهێندرا.
وەزیرانی وڵاتانی کۆمەڵەی حەوت بەتایبەت ئاماژەیان بە دۆخی عێراق کرد و گوتیان، "ئێمە سەرکۆنەی ئەو هێرشە بێشەرمانەی ئێران و میلیشیاکانی دەکەین بۆ سەر نێردە دیپلۆماسییەکان و ژێرخانی وزە، بەتایبەت لە هەرێمی کوردستانی عێراق. هەروەها ئەو هێرشانەی دەکرێنە سەر هێزەکانی ئەمریکا، هاوپەیمانی نێودەوڵەتی و گەلی عێراق"؛ جەختیشیان کردەوە، پشتیوانی لە مافی ئەو وڵاتانە دەکەن بۆ بەرگریکردن لە خاک و هاووڵاتییانیان."
لە بەشێکی دیکەی راگەیێندراوەکەدا، وڵاتانی کۆمەڵەی حەوت داوایان کرد ئێران دەستبەجێ بەرنامە مووشەکییەکەی رابگرێت و هەرگیز رێگەی پێنەدرێت ببێتە خاوەنی چەکی ئەتۆمی؛ هەروەها گوتیان، ئامادەن هەموو رێکارێکی پێویست بگرنە بەر بۆ پاراستنی بازاڕەکانی وزە، لەوانەش بەکارهێنانی کۆگاکانی نەوتی ستراتیژی و دڵنیابوونەوە لە ئاسایشی کەشتیوانی لە تەنگەی هورمزدا.
بەهۆی کاریگەرییەکانی جەنگەکەوە نرخی نەوت لە بازاڕەکاندا بەرزبووەتەوە. ئەو کات نرخی بەرمیلێک نەوتی برێنت بە 72 دۆلار بوو بەڵام ئێستا بە سەروو 100 دۆلار مامەڵەی پێوەدەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ