رووداو دیجیتاڵ
بەپێی راپرسییەکی نوێی هاوبەشی رۆژنامەی واشنتن پۆست، کەناڵی ئەی بی سی نیوز و ناوەندی ئیپسۆس، کە شەش مانگ پێش هەڵبژاردنەکانی نیوەخولی کۆنگرێسی ئەمریکا کراوە، پارتی کۆماری، واتە پارتەکەی دۆناڵد ترەمپی سەرۆکی ئەمریکا، لە دۆخێکی خراپدایە و خەڵکێکی زۆر لە شێوازی بەڕێوەبردنی وڵات لەلایەن ترەمپەوە ناڕازین، بەتایبەتی لە پرسی جەنگی ئێران و ئابووری. لە بەرامبەردا، پارتی دیموکراتەکان هیوایەکی زۆری بۆ گەڕاوەتەوە.
بۆچی خەڵک لە ترەمپ ناڕازین؟
لەدوای دەستپێکردنی جەنگی ئێران لە کۆتایی مانگی شوبات، پشتگیرییەکانی خەڵک بۆ ترەمپ بەخێرایی دابەزیون:
- لە پرسی شەڕی ئێران: 66%ی ئەمریکییەکان سیاسەتی ترەمپ بەرامبەر ئێران رەتدەکەنەوە.
- لە پرسی ئابووری: رازیبوون لە کارەکانی ترەمپ دابەزیوە بۆ 34%. ئەویش بەهۆی بەرزبوونەوەی نرخی بەنزین و هەڵئاوسانەوە.
- ژمارەی پێوانەیی لە ناڕەزایەتی: بەگشتی ئێستا 62%ـی ئەمریکییەکان لە کارەکانی ترەمپ ناڕازین، ئەمەش بەرزترین رێژەی ناڕەزایەتییە لە مێژووی هەردوو خولی سەرۆکایەتییەکەیدا.
دیموکراتەکان سوودمەند دەبن
ئەم دۆخە وایکردووە پارتی دیموکراتەکان چانسی بردنەوەیان لە هەڵبژاردنەکانی داهاتووی کۆنگرێسدا زیاتر بێت. ئێستا دەنگدەران بە جیاوازی 5 خاڵ زیاتر متمانەیان بە دیموکراتەکان هەیە و بە رێژەی 73%ـیش بەپەرۆشترن بۆ دەنگدان، لە کاتێکدا تەنیا 52%ـی کۆمارییەکان بۆ دەنگدان بەپەرۆشن. هەروەها خەڵک زیاتر متمانەی بە دیموکراتەکانە بۆ چارەسەرکردنی کێشەکانی تەندروستی، پەروەردە و گرانی.
تەندروستی و راستگۆیی ترەمپ جێگەی پرسیارە
راپرسییەکە دەریدەخات کە ئەمریکییەکان متمانەیان بە کەسایەتیی ترەمپیش کەم بووەتەوە:
- %59 پێیانوایە مێشکی وەک پێویست باش نییە بۆ سەرۆکایەتی.
- %55 پێیانوایە لە رووی جەستەییشەوە تەندروستیی باش نییە.
- %71 پێیانوایە کەسێکی راستگۆ و جێی متمانە نییە.
- %67 پێیانوایە کە لە بڕیارە گرنگەکاندا بە باشی بیر ناکاتەوە.
سیاسەتەکانی دیکەشی رەتدەکرێنەوە
نەک تەنیا لە ئابووری و جەنگی ئێران، بەڵکو خەڵک دژی چەندین بڕیاری دیکەی ترەمپن، لەوانە:
- %65 دژی بڕیارەکەی ترەمپن بۆ نەهێشتنی مافی وەرگرتنی وڵاتینامە بۆ ئەو منداڵانەی لە ئەمریکا لەدایکدەبن.
- %78 دژی بڕینی بودجەی توێژینەوە پزیشکییەکانن.
- %65 دژی بڕیاری زیادکردنی بودجەی سەربازین لە یەک ترلیۆنەوە بۆ 1.5 ترلیۆن دۆلار.
خەڵک لە بەرپرسانی دەوروبەریشی ناڕازییە
بەپێی راپرسییەکە، خەڵک لە تیمی سەرەکیی ترەمپیش ناڕازین، لەنێویاندا؛ رۆبەرت کەنەدی، وەزیری تەندروستی؛ کاش پاتێل، بەڕێوەبەری FBI؛ پیت هێگسەس، وەزیری بەرگری و مارکۆ روبیۆ، وەزیری دەرەوە کە هەموویان رێژەی ناڕەزایەتی لەسەریان زیاترە لە رازیبوون.
ئەم راپرسییە لە نێوان 24 بۆ 28ـی نیسانی 2026، لە رێگەی ئۆنلاینەوە و بە بەشداریی 2 هەزار و 560 کەس لە سەرانسەری ئەمریکا کراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ