رووداو دیجیتاڵ
ئاژانسی پەنابەریی یەکێتیی ئەورووپا، ئەم هەفتەیە رێنوێنیی نوێی سەبارەت بە دۆسیەی پەنابەریی خەڵکی رۆژئاوای کوردستان و سووریا بۆ وڵاتانی ئەندام ئاشکرا کرد، کە کاریگەریی راستەوخۆی لەسەر چارەنووسی هەزاران پەناخواز دەبێت.
بەپێی رێنوێنییە نوێیەکان، کەسێک چیدی تەنیا بەهۆی هەڵاتنی لە خزمەتی سەربازیی رژێمی ئەسەد مافی پەنابەری وەرناگرێت. هەروەها، عەرەبی سووننە تەنیا لەبەر ئەوەی ناسنامەیان عەرەبی سووننەیە، مافی پەنابەرییان پێنادرێت و داواکارییەکانیان رەتدەکرێتەوە.
لە بەرامبەردا، داواکاریی پەنابەریی پێکهاتەکانی دیکەی وەکو کورد، عەلەوی، درووز و کریستیانەکان پێویستە بە وردی و بەپێی کەیسەکانیان لێکۆڵینەوەی لەسەر بکرێت و بڕیاریان لەسەر بدرێت، نەک بە شێوەیەکی ئۆتۆماتیکی رەتبکرێنەوە.
یەکێک لەو خاڵانەی جێی سەرنجە لەنێو رێنوێنییەکان، ئەوەیە کە ئەو کەسانەی، وەکو یەکێتییەکە دەڵێت، لەدەست "هێزە کوردییەکان" هەڵاتوون، یان دەتوانن بیسەلمێنن کە بەرهەڵەستکاری هێزەکانی سووریای دیموکرات یان یەپەگە بوون و هەڕەشەیان لەسەرە، دەتوانن مافی پەنابەری وەربگرن.
هەروەها، ئەگەر کەسێک مەترسیی ئەوەی لەسەر بێت کە لەلایەن ئەو هێزانەوە منداڵەکەی بەزۆر چەکدار بکرێت، دەکرێت مافی مانەوەی پێبدرێت. رێنوێنییەکان جەخت لەوەش دەکەنەوە، پێویستە هەڵسەنگاندنی تایبەت بۆ کەیسی رۆژنامەڤانان، ژنان و منداڵان بکرێت و داواکارییەکانیان بە شێوەی ئۆتۆماتیکی رەتنەکرێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ