رووداو دیجیتاڵ
ئەنجوومەنی مافی مرۆڤی نەتەوە یەکگرتووەکان داوا لە ئێران دەکات ناردنەوەی پەنابەرانی ئەفغانستانی رابگرێت.
نووسینگەی ئەنجوومەنی مافی مرۆڤی نەتەوە یەکگرتووەکان لە راگەیێندراوێکدا کە ئەمڕۆ هەینی بڵاویکردووەتەوە، دەڵێت، بەپێی راپۆرتی ڤۆڵکەر تورک، کۆمیسیاری باڵای نەتەوە یەکگرتووەکان بۆ مافەکانی مرۆڤ، لە زیاتر لە 7 مانگی رابردوودا زیاتر لە یەک ملیۆن و 500 هەزار پەنابەری ئەفغانستانی لە ئێرانەوە گەڕێندراونەتەوە یان ناچاربوون بگەڕێنەوە بۆ ئەفغانستان.
نووسینگەکە دەڵێت، بەشێک لەو هاووڵاتییە ئەفغانستانییانە دەستبەسەر کراون و گەڕێندراونەتەوە، بەشێکی دیکەش بەهۆی هەڕەشە، ئازاردان و ترساندن ناچاربوون بگەڕێنەوە وڵاتی خۆیان.
ئەنجوومەنی مافی مرۆڤی نەتەوە یەکگرتووەکان داوا لە ئێران و وڵاتانی دیکە دەکات، ناردنەوەی پەنابەرانی ئەفغانستانی رابگرن و دەڵێت، رەنگە بەشێک لەوانەی دیپۆرت دەکرێنەوە، مەترسی دەستبەسەرکردن و ئەشکەنجەدانیان لەسەر بێ لە وڵاتی خۆیاندا.
ئەو داواکارییە لە کاتێکدایە، ئێران بەتایبەت دوای هێرشی ئیسرائیل لە مانگی رابردوودا هەڵمەتێکی فراوانی بۆ دەرکردنی پەنابەرانی ئەفغانستانی لەو وڵاتە دەستپێکردووە.
ئەسکەندەر موئمنی، وەزیری ناوخۆی ئێران دەڵێ، لە نەورۆزی ئەم ساڵەوە 800 هەزار پەنابەری ئەفغانستانییان گەڕاندووەتەوە وڵاتی خۆیان.
بە گوتەی ئەسکەندەر موئمنی، شەش ملیۆن پەنابەری ئەفغانستانی لەو وڵاتە دەژین کە دوو ملیۆن کەسیان پەنابەری نایاسایین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ