رووداو دیجیتاڵ
کۆمپانیای سپەیس ئێکس کە لەلایەن ئیلۆن مەسکەوە خاوەندارێتی دەکرێت، 26ـەمین کەشتیی خۆی بۆ وێستگەی نێودەوڵەتیی بۆشایی ئاسمان هەڵدا و هەندێک پێداویستی بۆ ستافی وێستگە نێودەوڵەتییەکە دەگوازێتەوە.
رۆژی شەممە 26ی تشرینی دووەمی 2022، مووشەکی فاڵکۆن 9 لە ویلایەتی فلۆریدای ئەمریکاوە هەڵدرایە بۆشایی ئاسمان کە نزیکەی سێ تۆن و نیو کەلوپەل و کەرەستەی هەڵگرتووە بۆئەوەی بیگوازێتەوە وێستگەی نێودەوڵەتیی بۆشایی ئاسمان.
جگە لەوە، مووشەکەکە دوو باڵی خانەی وەرگری وزەی خۆری پێوە بەستراوە کە وزەی زیاتر بۆ وێستگەکە دابیندەکەن بۆئەوەی بتوانێت توێژینەوە و گەڕانی زیاتر ئەنجامبدات.
ئەوەی جیاوازە ئەوەیە کە کەشتییەکە لەم گەشتەیدا تۆوی تەماتە دەبات بۆئەوەی بزانرێت کە ئایا دەکرێت لە وێستگەی نێودەوڵەتیی بۆشایی بڕوێندرێت و ببێتە سەرچاوەی خۆراک بۆ ئەو کەشتیوانانەی لەنێو وێستگەکەدان یاخود نا.
چاوەڕوان دەکرێت کەشتییەکەی سپەیس ئێکس بۆ ماوەی مانگێک لە وێستگەی نێودەوڵەتیی بۆشایی ئاسمان بمێنێتەوە تاوەکو ئەرکەکەی بەجێدەگەیێنێت و دواتر دەگەڕێتەوە سەر زەوی.
وێستگەی نێودەوڵەتیی بۆشایی ئاسمان لە ساڵی 1998 هەڵدراوە و بە دووریی 408 کیلۆمەتر لە خولگەی زەوی جێگیرکراوە.
هەریەکە لە ئەمریکا، رووسیا، ژاپۆن و ئەوروپا بەشێکن لێی و بە هەموویان حەوت کەشتیوانیان تێدا هەیە کە کاریان توێژینەوەیە لە زەوی و بۆشایی ئاسمان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ