Hewlêr (Rûdaw) – Li parêzgeha Wanê ya Bakurê Kurdistanê tayînkirina qeyûman hat protestokirin.
Bi sloganên “Dê qeyûm herin û gel were” tayînkirin qeyûm a navçeya Miksê ya Wanê hat şermezarkirin.
Piştî Colemêrg, Mêrdîn, Êlih, Xelfetî û Dêrsimê 29ê Çiriya Paşîn qeyûm tayînî Şaredariya Miksê ya DEM Partiyê jî hat kirin.
Platforma Ked û Demokrasiyê ya Wanê roja duşemê bi beşdariya parlamenterên Wanê yên DEM Partiyê, hevserokên şaredariyan û hejmareke zêde ya xelkê li Kolana Hunerê qeyûm şermezar kir.
Parlamenterê Wanê yê DEM Partiyê Sînan Çîftyurek di çalakiyê de got:
“Ez siyaseta qeyûm şermezar dikim. Îro li Rojhilata Navîn ku li navenda wê Kurdistan heye careke din şer, xwîn û dagirkerî heye.
Dewletên dagirker û yên emperyalîst careke din Herêma Kurdistanê kir gola xwînê.”
Di civîna Meclisa Şaredariya Artemêtê de jî qeyûm bi pankartên “Em dê destûrê nedin xesbê” hatin şermezarkirin û protestokirin.
“Serî netewand”
Hevseroka Şaredariya Artemêtê Rabîa Başak Koçê anî ziman:
“Mixabin bi hezar hincetên cuda kesên ji aliyê gel ve hatine hilbijartin û îradeye gel in, ji kar dûr dixin û qeyûm datînin.
Em her carê bi vê yekê re rû bi rû dimînin. Bila were zanîn ku gelê Kurd ti carî li hemberî polîtîkayên AKPyê serî netewand û natewîne jî.”
DEM Partiyê di hilbijartinên 31ê Adarê de 3 bajarên mezin, 7 bajar, 57 navçe û 10 bajarok bi tevahî 77 şaredarî bi dest xistin.
Piştî tayînkirina qeyûman a li ser şaredariyên Colemêrg, Mêrdîn, Êlih, Xelfetî, Dêrsim û Miksê niha 71 şaredari di dest wê de mane.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse