رووداو دیجیتاڵ
لە کاتێکدا کۆمپانیا نەوتییەکان لە هەرێمی کوردستان سەرقاڵی وتووێژن لەگەڵ حکومەتی هەرێمی کوردستان و حکومەتی عێراق سەبارەت بە شایستە داراییەکانیان، رووبەرووی ئاڵنگاریی زۆر بوونەتەوە؛ کۆمپانیایەکی بەرهەمهێنەری نەوتیش وەبەرهێنانەکانی لە هەرێمی کوردستان زیاد دەکات.
کۆمپانیای شاماران، کە کۆمپانیایەکی کەنەدییە و سەرنجی لەسەر وەبەرهێنانە لە کەرتی نەوتی هەرێمی کوردستان، رایگەیاندووە، "پشکەکانی کۆمپانیای تاقەی ئیماراتی لە کێڵگەی ئەترووش دەکڕێتەوە."
کۆمپانیای تاقەی ئیماراتی لە کێڵگەی ئەترووش خاوەنی 47.4%ی پشکەکانی کارکردنە.
پێشتر کۆمپانیای شاماران خاوەنی 27.6%ی پشکەکانی کارکردن بووە لە کێڵگەی ئەترووش، بەڵام بەپێی راگەیاندنی رۆژی دووشەممەی ئەو کۆمپانیایە، پشکەکانی خۆی لەو رێژەیە بەرزدەکاتەوە بۆ 50%.
دوای کڕینی هەموو پشکەکانی کۆمپانیای تاقە، وەکو کۆمپانیاکە دەڵێت، "لە قۆناخی دووەمدا، 25%ی پشکەکان دەفرۆشێتەوە بۆ کۆمپانیای HKNی ئەمریکی لەڕێگەی ئەو گرێبەستەوە کە دەبێت حکومەتی هەرێمی کوردستان پەسندی بکات، بەمەش کۆمپانیای HKN دەبێتە کۆمپانیای سەرکار لە کێڵگەی ئەترووش و ئەرکی بەرهەمهێنانی نەوت لە کێڵگەی ئەترووش دەگرێتەدەست."
كۆمپانیای HKN جگە لەم گرێبەستە نوێیە کە راگەیێندراوە، لە کێڵگەی سەرسنگ کار دەکات و خاوەنی 62%ی پشکەکانی کارکردنە و رۆژانەی نزیکەی 35 هەزار بەرمیل نەوت بەرهەمدەهێنێت.
ئەگەر هاتوو ئەم مامەڵەیە تەواو ببێت و حکومەتی هەرێمی کوردستان پەسندی بکات، لە کێڵگەی ئەترووش کۆمپانیای شاماران دەبێتە خاوەنی 50%ی پشکەکان و کۆمپانیای HKN دەبێتە خاوەنی 25% و حکومەتی هەرێمی کوردستانیش 25%.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ