هونەرمەندێک هەوڵدەدات شمشاڵ بەناوی کورد لە یونسکۆ تۆمار بکات

 

ئەمڕۆ یەکشەممە 5-10-2025، کاوە داوەری، ژەنیار و مامۆستای شمشاڵ، لە لەکاتی بەشداریکردن لە بەرنامەی (رۆژی هیوا جەمال)، بە تۆڕی میدیایی رووداوی راگەیاند، هەوڵی بە جیهانیکردنی شمشاڵ، چیرۆکێکی 18 ساڵەی لە پشتە کە دەگەڕێتەوە بۆ پەیمانێک کە بە مامۆستای کۆچکردوو، قالە مەڕەی داوە.داوەری دەڵێت: "18 ساڵ لەمەوبەر، کاتێک لە خزمەتی مامۆستا قالە مەڕەدا بووم، یەکێک لە خەمەکانی ئەوە بوو کە دەیگوت خەمی ئەوەم هەیە بەدوای خۆمدا شمشاڵ لەناونەچێت. منیش ئەو کاتە پێمگوت هەتا بتوانم لە دەست و دەسەڵاتمدا بێت، هەوڵی بۆ دەدەم".

 

ئەو هەوڵانە بێ ئەنجام نەبوون؛ 10 ساڵ لەمەوبەر شمشاڵ وەک ئامێرێکی کوردی لە ئێران تۆماری میللی بۆ کرا، بەڵام ئامانجی گەورەتر ناساندنیەتی بە جیهان. کاوە داوەری دەڵێت: "رێگەیەک نەبوو بۆ تۆماری نێودەوڵەتی، بۆیە دەبوو هەنگاو بە هەنگاو کار بکەین تا بتوانین یەکەمجار تۆماری دنیایی لە یوونسکۆ بۆ بکەین".

 

کاوە داوەری دەڵێت: "وەسیەتی مامۆستا قالە مەڕە ئەوە بوو کە شمشاڵەکەی لە مۆزەخانەی هەولێر دابنرێت"، بەڵام تاوەکو ئێستا ئەو وەسیەتە جێبەجێ نەکراوە و شمشاڵەکە لای بنەماڵەکەی ماوەتەوە.

 

سەبارەت بە هۆکاری دواکەوتنەکە، داوەری روونیکردەوە: "یەکەمیان ئەوەیە کە مۆزەخانەی حکومەتی هەرێمی کوردستان پێویستە داواکاریی فەرمی بکات بۆ هێنانەوەی، بنەماڵەکەش ئامادەن. بەهۆی هەندێک کێشەوە دواکەوت، بەڵام ئێستا بنەماڵەکەی ئامادەن هەر کاتێک داواکارییەکە بکرێت، شمشاڵەکە بهێنن بۆ مۆزەخانەی هەولێر".

 

ئێستا شمشاڵ تەنیا لە مەقامە کوردییەکاندا قەتیس نەماوە، بەڵکو لەڕێگەی کاری ئەکادیمییەوە، توانیویەتی بچێتە ناو ئۆرکێسترا جیهانییەکانەوە و لەگەڵ دەیان ئامێری دیکەدا بژەنرێت، ئەمەش هەنگاوێکی گەورەیە بەرەو ئەو رۆژەی کە دەنگی ئەم ئامێرە کوردییە لە هەموو جیهاندا ببیسترێت.

 

هەوڵەکانی کاوە داوەری تەنیا لە بواری ژەنین نییە، بەڵکو پشتئەستوورە بە لێکۆڵینەوەی قووڵی ئەکادیمی و توێژینەوەی زانستی. ناوبراو خاوەنی دوو بەرهەمی چاپکراوی گرنگە کە وەک بنەمایەکی تیۆری بۆ کارەکانی دادەنرێن:

یەکەمیان کتێبی (شمشاڵ: نەوای هەناسەی چیا - Shmshal: Voice of the Mountain Breath) کە لێکۆڵینەوەیەکی ورد لەسەر مێژوو، پێکهاتە و گرنگیی کولتووریی ئامێری شمشاڵ. کتێبی دووەمیشی بە ناوی "ئاوازی چیا و با"، بە شێوەیەکی گشتگیرتر قسە لەسەر میوزیکی رەسەنی کوردی دەکات. داوەری لە رێگەی ئەم دوو کتێبەوە دەیەوێت پارێزگاری لە رەسەنایەتیی میوزیکی کوردی و شمشاڵ بکات و وەکو سەرچاوەیەکی ئەکادیمیش بۆ هەوڵەکانی بۆ ناساندنی ئامێرەکە لە جیهاندا؛ بەکاریان بهێنێت.