هەڵەیەک روویدا! دووبارە هەوڵبدە
رووداو دیجیتاڵ
بەهۆى بڵاوبوونەوەى نەخۆشیى تەبەق لەنێو مەڕوماڵاتى ناوچەیەکى پارێزگاى نەینەوا، زیاتر لە 135 سەر مەڕ مرداربوون و بڕیادرا ناوچەکە دابخرێت، هەروەها سنوورى پارێزگاکە لەگەڵ پارێزگاکانى دیکە بۆ هێنان و بردنی مەڕوماڵات داخرا.
ئەو نەخۆشییە لە ناوچەى گۆگجەلى لە رۆژهەڵاتى شارى موسڵى ناوەندى پارێزگاى نەینەوا بڵاوبووەتەوە. عەبدوڵڵا سەعید حەموو، بەڕێوەبەرى کشتوکاڵى نەینەوا بە تۆڕى میدیایی رووداوى راگەیاند: "بە گوێرەى ئامارى سەرەتایی، 135 سەر مەڕ بەهۆى نەخۆشیى تەبەقەوە لە گۆگجەلى مردار بوون و 782 سەر مەڕى دیکەش تووش بوون".
عەبدوڵڵا سەعید حەموو گوتى: "لە گۆگجەلى زیاتر لە 75 هەزار سەر مەڕ هەن. بڕیادراوە ئەو شوێنە دابخرێت و کێڵگەکانى بەخێوکردنى مەروماڵات کەرەتینە بکرێن و دەرمانپرژێن بکرێن تاوەکو نەخۆشییەکە کۆنترۆڵ دەکرێت".
بەگوێرەى ئامارەکانى حکومەتى خۆجێیی نەینەوا، 43%ـى سامانى ئاژەڵى عێراق لە سنوورى ئەو پارێزگایەیە.
بەڕێوەبەرى کشتوکاڵى نەینەوا رایگەیاند، بڕیاردراوە بۆ ماوەیەک بردنی مەڕوماڵات بۆ نەینەوا قەدەخە بکرێت تاوەکو بە تەواوى کۆنترۆڵى نەخۆشیى تەبەق دەکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ