تەندروستی
د. ئەنتۆنی فاوچی، سەرۆکی پەیمانگەی نیشتمانیی ئەمریکا بۆ نەخۆشییە گوازراوەکان و گەورە راوێژکاری جۆ بایدن، سەرۆکی ئەمریکا بۆ بەڕەنگاربوونەوەی کۆرۆنا. وێنە: AP
رووداو دیجیتاڵ
سەرۆکی پەیمانگەی نیشتمانیی ئەمریکا بۆ نەخۆشییە گوازراوەکان و گەورە راوێژکاری سەرۆکی ئەمریکا بۆ بەرەنگاربوونەوەی ڤایرۆسی کۆرۆنا، واز لە پۆستەکەی دەهێنێت، بەڵام خانەنشین نابێت.
د. ئەنتۆنی فاوچی، سەرۆکی پەیمانگەی نیشتمانیی ئەمریکا بۆ نەخۆشییە گوازراوەکان و گەورە راوێژکاری جۆ بایدن، سەرۆکی ئەمریکا بۆ بەڕەنگاربوونەوەی کۆرۆنا رایگەیاند، لە مانگی کانوونی یەکەمی داهاتووەوە دەست لە هەردوو پۆستەکەی وەکو راوێژکاری سەرۆکی ئەمریکا و سەرۆکی پەیمانگای نیشتمانی دەکشێنێتەوە.
بەڵام فاوچی تەمەن 81 ساڵ، لە راگەیێندراوەکەدا دەڵێت ئەو "خانەنشین نابێت" و دەست بە قۆناخێکی نوێ لە پیشەکەی دەکات، بەبێ ئەوەی هیچ ئاماژەیەک بە کاری داهاتووی بکات.
دوای بڕیارەکەی فاوچی، سەرۆکی ئەمریکا لە راگەیێندراوێکدا ستایشی رۆڵ و خزمەتی فاوچیی لە کەرتی تەندروستیی ئەمریکا کرد و گوتی، "ئەو بووە هۆی پاراستنی گیانی هەزاران ئەمریکی و هاووڵاتییانی دیکە لە سەرانسەری جیهان". بایدن لە ستایشی فاوچیدا ئەوەیشی گوتووە کە "ئەمریکا بەهێزتر و خۆڕاگرتر و تەندروستترە بەهۆی فاوچییەوە."
فاوچی لە ساڵی هەشتاکانەوە سەرۆکی پەیمانگەی نیشتمانیی ئەمریکایە بۆ نەخۆشییە گوازراوەکان، راوێژکاری تەندروستیی حەوت سەرۆکی ئەمریکاش بووە و لەوکاتەشەوە کاری بۆ دۆزینەوەی چارەسەری چەندین ڤایرۆس و پەتا کردووە لە ڤایرۆسی HIV ئایدز تاوەکو کۆڤید 19، ئیبۆلا و زیکا، لە سەرەتای ئەمساڵیش ئاوڵەی مەیموون.
لە سەرەتای بڵاوبوونەوەی ڤایرۆسی کۆرۆنا، فاوچی بووە سەرچاوەی سەرەکی بۆ زانیاریی دروست لەبارەی ئەو ڤایرۆسەوە، سەرەڕای ئەوەی هەمیشە بۆچوونی جیاواز و ناکۆکی لەگەڵ دۆناڵد ترەمپ، سەرۆکی ئەوکاتی ئەمریکا هەبوو، بەتایبەت لەبارەی بەستنی ماسک و بەکارهێنانی ڤاکسین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ