گوتەبێژی هێزەکانی باکووری دیموکرات: 2000 چەکداری داعش لە بیابانی سووریا هەن

 

لە هەڤپەیڤینێکدا کە رۆژی دووشەممەی رابردوو (30ـی حوزەیران) محەممەد عیسا، لە تۆڕی میدیایی رووداو لەگەڵ مەحموود حەبیب، گوتەبێژی فەرمیی هێزەکانی (باکووری دیموکرات) ئەنجامی دا، حەبیب رایگەیاند، هێزەکانی ئەمریکا لە سووریا "دەمێننەوە" و رەنگە لە دوو بنکەی گەورە لە باکووری رۆژهەڵاتی وڵات جێگیر ببن.

 

حەبیب جەختیشی کردەوە، کە لە ماوەی شەڕی 12 رۆژەدا، هیچ مووشەک و درۆنێکی ئێرانی راستەوخۆ نەکەوتوونەتە خوارەوە بۆ سەر بنکەکانی ئەمریکا لە سووریا.

 

 

 

 

مەحموود حەبیب: بەڵێ، وەک بیرم بێت چوار رۆژ لەمەوبەر، ژەنەراڵە ئەمریکییەکە، فەرماندەی هێزەکانی هاوپەیمانیی نێودەوڵەتی لە سووریا و عێراق رایگەیاند، کە ئۆپەراسیۆنێک لە بیابانی سووریا ئەنجام دەدرێت. ئەم راگەیاندنە دوای ئەوە هات، کە راپۆرتە هەواڵگرییەکانی بەریتانیا، ئەمریکا و هەندێک وڵاتی دیکەی هاوپەیمانیی دژی داعش لە سووریا، ئاماژەیان بەوە کرد کە جووڵەیەکی گەورەی شانەکانی رێکخراوەکە لە بیابانی سووریا هەیە.

 

ئەمە دەگەڕێتەوە بۆ رووخانی رژێم و کشانەوەی هێزەکانی رووسیا و ئەنجامنەدانی گەشتی چاودێریی ئاسمانی بۆ داپۆشینی ئەو ناوچە فراوانە، کە زیاتر لە سێیەکی رووبەری سووریا پێکدێنێت. بۆیە پێویست بوو هەڵمەتێک لەم ناوچەیە ئەنجام بدرێت، چونکە ئەو بۆشاییە سەربازی و ئەمنییە رێگەی بە چەکدارانی داعش دا جارێکی دیکە کۆببنەوە و هەوڵی پێکهێنانی گرووپ و شانە بدەن بۆ هێرشکردنە سەر ناوچە ئاوەدانەکانی دەوروبەر، وەک گوندەوارەکانی حەلەب، حومس، گوندەوارەکانی دیمەشق و رەنگە بگەنە دیمەشقیش.

 

ژینگەیەکی لەبار بۆ چالاکییەکانی رێکخراوەکە هەیە، کە دەزگا هەواڵگرییەکان چاودێرییان کردووە، ئەمەش وای لە هێزەکانی هاوپەیمانیی نێودەوڵەتی کرد، دەستپێکردنی ئەم ئۆپەراسیۆنە رابگەیێنن. پێموایە بەشداربووانی ئۆپەراسیۆنەکە لە پلەی یەکەمدا هێزەکانی سووریای دیموکراتن، کە هاوپەیمانی هەمیشەیی هاوپەیمانیی نێودەوڵەتین لە شەڕی دژی تیرۆر. هەروەها ئەگەری هەیە هێزەکانی سووریای ئازاد یان هەندێک هێزی دیکەش لەم ئۆپەراسیۆنەدا بەشدار بن.

 

 

مەحموود حەبیب:  ژەنەراڵەکە لەم بارەیەوە هیچی نەوت. با لە رووی مەیدانییەوە قسە بکەین، ئۆپەراسیۆنی سەربازیی هاوبەش پێویستی بە راهێنان، مەشقی جەنگی و هەندێکجار مانۆڕی راهێنان هەیە، بۆ ئەوەی ئەو هێزە هاوپەیمانانە بتوانن پێکەوە لەسەر زەوی کار بکەن.

تاوەکو ئێستا هیچ راهێنانێکی هاوبەش لەنێوان ئەندامانی وەزارەتی بەرگری و هێزەکانی هاوپەیماناندا نەکراوە، بۆیە ئەنجامدانی کاری مەیدانیی هاوبەش قورسە. بابەتەکە دوورخستنەوەی هیچ لایەنێک نییە، بەڵکو بۆ ئەوەیە ئۆپەراسیۆنەکە ئاسانتر جێبەجێ بکرێت. قورسە هێزەکان بەبێ ئامادەکاریی پێشوەختە و راهێنانی پێویست و هەماهەنگیی ئۆپەراسیۆنەکان و مەیدانی، بەشداری لە کارێکی هاوبەشدا بکەن.

 

 

مەحموود حەبیب: ئۆپەراسیۆنەکە هێشتا دەستی پێنەکردووە. هەندێک لە ڤیدیۆکان کۆنن، هەندێکی دیکەشیان جووڵەی سەربازیی کاروانەکانی هەسەدەیە تەنیا لەناوچەی باکووری رۆژهەڵاتی سووریا. راهێنانی چڕوپڕ لەنێوان هێزەکانی هاوپەیمانیی نێودەوڵەتی و هێزە تایبەتەکانی هەسەدەدا هەیە؛ راهێنان لەسەر دابەزینی ئاسمانی، راهێنان لەسەر بەدواداچوونی شانەکانی داعش، هەروەها ئۆپەراسیۆنی مەیدانی دژی شانەکان لە ناوچەی باکووری رۆژهەڵاتی سووریا هەیە. لە لایەکی دیکەشەوە راهێنانەکان بەردەوامن، بۆیە ئەمە ئاماژەیە بۆ ئەوەی کە رەنگە ئۆپەراسیۆنێک لە ئارادا بێت یان نزیک بێت، بەڵام هێشتا هیچ هێزێکی هەسەدە نەپەڕیوەتەوە بۆ رۆژئاوای فورات.

 

 

مەحموود حەبیب:  لە راستیدا پێموانییە چەند مانگ بخایێنێت، چونکە دۆخی ئەمنی ناسکە و وەک باسم کرد، راپۆرتە هەواڵگرییەکان جەخت لەوە دەکەنەوە، کە چەکدارانی رێکخراوەکە توانیویانە خۆیان لە بیابانی سووریا کۆبکەنەوە و دوای رووخانی رژێمی ئەسەد، دەستیان بە هەندێک چەک و تەقەمەنی گەیشتووە.

 

هەروەها کۆنترۆڵی ئەمنی لە هەندێک ناوچە لاوازە، بۆیە دزەکردن ئاسانە. بینیمان لە دیمەشق چی روویدا، وەک تەقینەوەکەی کەنیسەکە و هەندێک رووداوی دیکە کە ئاماژەن بۆ ئەوەی کاری تیرۆریستی روودەدەن یان رەنگە بەرفراوانتر رووبدەن.

 

هێزەکانی رۆژئاوا زۆر هەستیارن بەرامبەر بە بابەتی گەڕانەوەی رێکخراوی داعش. ناتوانن رێگە بدەن داعش جارێکی دیکە بگەڕێتەوە. ئەگەر داعش بتوانێت کۆنترۆڵی شارێک یان شارۆچکەیەکی گەورە بکات، لەناوبردنی زۆر قورس دەبێت. ئێوە سیاسەتی رێکخراوەکە دەزانن، کە بریتییە لە چوونە ناو شارەکان و بە بارمتەگرتنی دانیشتووان و زۆر گرنگی بە قەبارەی ئەو خوێنە نادەن، کە دەڕژێت، بۆیە زۆر مەترسیدارە شار و شارۆچکەکانی سووریا لەژێر هەڕەشەی رێکخراوەکەدا بەجێبهێڵین.

 

بۆیە هێزەکانی هاوپەیمانان لەم بارەیەوە هۆشدارییان دا و ژەنەراڵ کلیڤن رایگەیاند، کە ئۆپەراسیۆنێک لە ئارادایە. سەبارەت بەوەی کەی دەستپێدەکات، لە ماوەی چەند رۆژێک یان چەند مانگێک، لە راستیدا هیچ زانیارییەکم نییە، بەڵام رەنگە زۆر درێژە نەکێشێت.

 

 

مەحموود حەبیب: ئەم ژمارەیە بە یەکجار بڵاونابێتەوە. پێموایە پلانی ئۆپەراسیۆنی لەم شێوەیە بریتییە لە دابەشکردنی ناوچەکە بۆ چەند کەرتێک و پاککردنەوەی ئەم کەرتانە یەک لە دوای یەک، واتە گەمارۆدانی دوژمن لە ناوچەی دیاریکراودا بۆ لەناوبردنی.

 

هەروەها پێموایە هێزەکانی هاوپەیمانیی نێودەوڵەتی بەو توانایەی هەیانە لە چاودێری و بەدواداچوونی دوورمەودا - مەبەستم لە رێگەی مانگە دەستکردەکان و بەدواداچوونی پەیوەندییەکانە - هەروەها بانکی ئامانجیان هەیە کە دەیانەوێت پێی بگەن. پلانی گونجاو بۆ ئەمە دادەنێن: دابەشکردنی ناوچەکە بۆ چەند کەرتێک و پاککردنەوەی کەرتەکان یەک لە دوای یەک. ئەمە تاکە رێگەیە بۆ کێوماڵکردنی هەموو ئەم ناوچە جوگرافییە فراوانە.

 

 

 

مەحموود حەبیب:  لە راستیدا بیابانی سووریا ناوچەیەکی بێ دانیشتووانە و زۆر ناوچەی سەختی تێدایە، کە بۆ حەوانەوەی چەکدارانی رێکخراوەکە گونجاون. چەکدارانی رێکخراوەکە دەتوانن لە ناوچە نیشتەجێیەکان نزیک ببنەوە و سەرانە بسێنن یان موڵک و ماڵ تاڵان بکەن، بەمەش دەتوانن خۆیان لە رووی داراییەوە دابین بکەن.

 

ناتوانین ژمارەکە بخەمڵێنین، بەڵام پێموایە ژمارەکە نزیکە لەوەی پێنتاگۆن باسی کردووە، بەڵام لە سووریا و لە بیابانەکەدا کەمتر نییە لە دوو هەزار چەکدار. چەکدارانی رێکخراوەکە ناوچە سەختەکانی نێو دڵی بیابان و چیای بیشری و چیای عەبدولعەزیز و ئەو ناوچانەی ئەشکەوتیان تێدایە و شاردنەوەیان لە فڕۆکە ئاسانە، وەک پەناگە بەکاردەهێنن. دەتوانن لەوێ خۆیان حەشار بدەن و بۆ ماوەیەکی درێژ بمێننەوە.

 

بۆیە ئەم ژینگە لەبارە بووە هۆی مانەوەی داعش. پێشتر هەوڵێکی ئاسمانیی پچڕ پچڕی رووسیا هەبوو، کە گەشتی چاودێریی بەسەر بیابانەکەدا ئەنجام دەدا، بەڵام ئەم ئۆپەراسیۆنانە زیاتر لە دوو ساڵە راگیراون. هەندێک گەشتی چاودێریی هێزەکانی هاوپەیمانیی نێودەوڵەتی هەن، بەڵام بەو شێوەیە چڕ نین کە جووڵەی رێکخراوەکە لەسەر زەوی ئیفلیج بکەن.

 

پێموایە هێزەکانی هاوپەیمانان و لە سەرووی هەمووشیانەوە ئەمریکا، هەستیان بە مەترسیی بەجێهێشتنی ئەم ناوچەیە کردووە بەبێ چاودێریی ئاسمانی لانیکەم، بەڵکو ئێستا دەیانبینین ئامادەکاری بۆ ئۆپەراسیۆنێکی زەمینی دەکەن. پێموایە ژمارەی هێزە بەشداربووەکان بەسە، چونکە ئەم هێزانە ئەزموونی پێویست، کەرەستەی گونجاو، پشتیوانیی ئاسمانی، تۆڕی پەیوەندیی بەهێز و هێزیان هەیە کە دەتوانن لە رێگەیەوە کۆنترۆڵی دۆخەکە بکەن.

 

 

مەحموود حەبیب: ئەوانە دەتوانن ئەم ئەرکە جێبەجێ بکەن، ئەگەر پێویست بکات هێزی زیاتریان بۆ بنێردرێت، ناوچەی پشتیوانی لە رۆژهەڵاتی فورات، لە هەرێمی کوردستان و لای هێزەکانی هاوپەیمانان هەیە، کە دەتوانن هێزی پشتیوانی بۆ ئەم ناوچەیە بنێرن.

 

 

 

مەحموود حەبیب: پێموانییە، هیچ پێکدادانێکی راستەوخۆ روونادات، ئێمە لێرە باسی ناوچەی کراوە و فراوان دەکەین، کە پێویستی بە هەوڵێکی سەربازیی راستەقینە و شارەزاییەکی گەورەی شەڕکردن هەیە لە رووبەڕووبوونەوەی رێکخراوەکە یان بەگشتی تیرۆر.

ئەو هێزە سەربازییانەی لە شارەکانی دیمەشق و حومسدان، لە پێکداداندا نین لەگەڵ هێزەکانی هاوپەیمانان و لە پێکدادانیشدا نابن لەگەڵ هێزەکانی هاوپەیمانان یان هەسەدە. ئەمە ئەرکێکی تەواوکەری ئەرکی وەزارەتی بەرگرییە، وەزارەتی بەرگریش لەم قۆناغەدا رەنگە نەتوانێت ئەو بیابانە کێوماڵ بکات و توانای ئاسمانیی گونجاوی نییە بۆ ئەنجامدانی ئەم کارە.

کەواتە هێزەکانی هاوپەیمانان و هێزەکانی سووریای دیموکرات تەواوکەری ئەوەن، کە وەزارەتی بەرگری دەیەوێت، کە خۆیشی تووشی مەترسیی رێکخراوەکە بووەتەوەو مەترسیی رێکخراوەکە هەڕەشەیەکی گەورەیە بۆ سەر بوونی. بۆیە پێموایە لەم بابەتەدا زیاتر رێککەوتن و لێکتێگەیشتن دەبێت نەک ناکۆکی و پێکدادان، چونکە نە بارودۆخی ئەمنی رێگە بەوە دەدات و نە رووبەڕووبوونەوەیەکیش لەنێوان ئەو هێزانە و هێزەکانی ناسراو بە سوپای نیشتمانی یان هێزەکانی وەزارەتی بەرگری روودەدات.

 

 

مەحموود حەبیب:  ئێستا ناوچەی تەنف، ناوچەی 55 کیلۆمەتر، ناوچەیەکی زۆر گەورەیە و هێزەکانی هاوپەیمانیی نێودەوڵەتیی تێدایە. پێموایە پێویستیان بەوەیە کە هێزەکانی سووریای دیموکرات تێیدا بڵاوببنەوە، چونکە هێزەکانی سووریای ئازادیش لەوێن و هاوبەشی هاوپەیمانیی نێودەوڵەتین لە شەڕی دژی تیرۆر، بۆیە ناوچەیەکی گەورە دادەپۆشن.

راپۆرتەکان باس لەوە دەکەن کە ئامادەکاری بۆ دروستکردنی بنکەیەکی سەربازیی ئەمریکی لە ناوچەی دومەیر دەکرێت، بەڵام تاوەکو ئێستا ئەمە پشتڕاست نەکراوەتەوە. ئەگەر ئەمە رووبدات، ئەوا رەنگە هێزەکانی هاوپەیمانیی نێودەوڵەتی بنکە یان رێگەی دابینکردنی پێداویستییەکانیان لەگەڵ رۆژهەڵاتی فورات بهێڵنەوە.

بابەتەکە لە پلەی یەکەمدا، وەک عەقیدەی شەڕکردنی ئێمە لە هەسەدە، پەیوەندی بە بەرەنگاربوونەوە و شەڕی دژی رێکخراوی داعشەوە هەیە، چونکە مەترسی لەسەر سووریا و گەلەکەی دروست دەکات. ئێمە هیچ تەماحێکمان لە هیچ شوێنێکی دیکە نییە، ئاشتی و سەلامەتیمان بۆ گەلی سووریا دەوێت و لەم پێناوەشدا قوربانیی زۆر گەورەمان داوە. هەموو گەلی سووریا ئێستا دەزانێت کە چەندە گرنگە هێزەکانی سووریای دیموکرات ئەم ئەرکە جێبەجێ بکەن.

 

 

 

مەحموود حەبیب:  لە راستیدا هیچ ئامارێکی وردم لەسەر ژمارەی هێزەکانی ئەمریکا نییە. سەبارەت بە کشانەوەی ئەمریکا، ئەوە بریتییە لە دووبارە جێگیربوونەوە. وەک هەندێک راپۆرتی ئەمریکی باسیان کردووە، ئەمە بۆ کەمکردنەوەی تێچووی کارپێکردنی بنکە زۆرەکانە. دەیانەوێت ئەم تێچووە کەمبکەنەوە و هێزەکانی ئەمریکا لە یەک شوێن کۆبکەنەوە، لە بنکەی زۆر گەورەدا دایانبنێن کە پارێزراوتر و قایمترن، لەبری ئەوەی بەسەر زیاتر لە 17 بنکەدا بڵاویان بکەنەوە، کە پێشتر لە باکووری رۆژهەڵاتی سووریا هەبوون.

کەواتە بابەتەکە پەیوەندی بە تێچووی کارپێکردن، دۆخی ئەمنی، کۆنترۆڵی ئەمنی، بەردەوامی و دینامیکییەتی جووڵەی ئەم هێزانەوە هەیە. بەم شێوەیە هێزی زەمینی، ئاسمانی و پشتیوانی لە یەک شوێن دەبن و دەتوانن پشتگیری لە یەکدی بکەن، لەبری ئەوەی بەسەر چەندین ناوچەدا دابەش ببن.

دووبارە دەڵێمەوە، بوونی هێزەکانی ئەمریکا لە سووریا بووەتە بڕیارێکی ستراتیژیی ئیدارەی ئەمریکا و لانیکەم لەم قۆناغەدا گۆڕانکاریی بەسەردا نایەت. گرژییە گەورەکانی ناوچەکە و گرنگیی ئەم بنکانە بۆ مانەوە لە سووریا دەبینین. جگە لەوەش، مانەوەیان پێویستە بۆ بەردەوامیدان بە شەڕی دژی رێکخراوەکە کە دەیەوێت هەر دەرفەتێک بقۆزێتەوە بۆ گەڕانەوە. ئەمەش هەڕەشە بۆ سەر ئاسایشی نیشتمانی لە سووریا و ئاشتی و ئاسایشی نێودەوڵەتی دروست دەکات، بۆیە ئەرک لەسەر هێزەکانی ئەمریکایە، کە بمێننەوە و ئەم بنکانە بە شێوەیەک بەهێز بکەن کە لەگەڵ رۆڵی گرنگی ویلایەتە یەکگرتووەکاندا بگونجێت.

 

 

مەحموود حەبیب:  پێموایە دوو بنکە دەبێت. هەندێک راپۆرت باس لە دوو بنکەی گەورە لە ناوچەی باکووری رۆژهەڵاتی سووریا دەکەن. بەڵام وەک گوتم، گرنگتر لە هەمووی ئەوەیە کە هێزەکانی ئەمریکا دەمێننەوە و ئەم بنکانە توانای دەستوەردانیان دەبێت لەو ئەرکانەی پێویستن، چ لە رووی ئاسمانی، زەمینی یان ئۆپەراسیۆن لەڕووی پەیوەندی و هەواڵگرییەوە.

 

 

مەحموود حەبیب:  ئیدارەی ئەمریکا لە ساڵی 2019ـەوە تاوەکو ئێستا باسی کشانەوەیەکی راستەقینەی لە ناوچەی باکووری رۆژهەڵاتی سووریا نەکردووە. تەنیا باس لەوە کراوە کە ئەم کشانەوەیە رەنگە رووبدات، کاتێک ویلایەتە یەکگرتووەکان دڵنیا دەبێتەوە کە سووریا پێویستی بەم هێزانە نییە، بەمەش کێشەی رێکخراوی داعش کۆتایی هاتبێت و دۆخی سووریا خرابێتە سەر رێچکەی سەلامەتی وەک دەگوترێت، ئینجا ئیدی پێویست بە بوونی هێزەکانی ئەمریکا ناکات، بەڵام تاوەکو پێویستی بە مانەوەی ئەم هێزانە هەبێت، دەمێننەوە. وەک گوتم، ئەمە بەرژەوەندیی هەردوو لا مسۆگەر دەکات، چ سووریا و چ ئێوە.

 

 

 

مەحموود حەبیب:  لە راستیدا قسەیەکی لۆژیکییە، قسەی پیاوێکی بەرپرسە. ئێمە لە پڕۆسەی ئەم تێکەڵکردنەداین. لیژنەی هاوبەش هەن کە لێکۆڵینەوە لە هەموو وردەکارییە پێویستەکان دەکەن بۆ بەدیهێنانی ئەم تێکەڵکردنە، چ لە رووی سەربازی، سیاسی، ئابووری، ئەمنی و هەموو ئەو کەرتانەی کە دەبێت لەگەڵ یەکتردا تێکەڵ بکرێن. لیژنەی پسپۆڕ هەن کە ئەم کارە دەکەن و هیوادارین ئەم تێکەڵکردنە بەم زووانە رووبدات.

بۆیە، دەبێت قسەکردن لەگەڵ یەک دەوڵەتدا بێت نەک دوو دەوڵەت. ئێمە هەوڵ نادەین دوو بڕیار لە سووریادا هەبێت، وەک چۆن ژەنەراڵ مەزڵووم عەبدی گوتی: "رێگە نادەین دوو سوپا لە سووریادا هەبێت." بۆیە ئەم پڕۆسەیە بەردەوامە و هیوادارین بەم زووانە بگاتە ئەنجام.

 

 

مەحموود حەبیب: بەڵێ، خۆت گوتت، لە پشت پەردەوە شتێک روودەدات و ئەوە گرنگترە. ئێمە رێز لە ئازادیی میدیا دەگرین و هیوادارم میدیا کراوە بێت و رەخنە بگرێت. بەڵام میدیای بەسیاسیکراو، ئەو میدیایەی راستییەکان دەشێوێنێت یان دەیەوێت ناکۆکی لە شەقامی سووریادا دروست بکات، بێگومان میدیایەکی چەواشەکارە و هیچ سوودێکی نییە، نە بۆ گەلی سووریا لە رۆژهەڵاتی سووریا و نە لە شوێنەکانی دیکەش.

کەواتە ئەوەی ئێستا روودەدات، رێککەوتن یان پڕۆسەی چارەسەرکردنی هەموو دۆسییە هەڵپەسێردراوەکانی نێوان هەردوو لایە، بۆ ئەوەی دواتر ئاشکرا بکرێن. وەک چۆن هەمیشە سوپرایزیان کردووین، گفتوگۆ هەبوون کە وردەکارییەکانیمان نەدەزانی، پاشان لەناکاو دەبینین بڕیاری زۆر گرنگ لەم چوارچێوەیەدا دەرچووە. ئەمەش ئەوەیە کە من پێشبینی دەکەم؛ ئەوەی بە دوور لە میدیا باس دەکرێت، لە بەرژەوەندیی هاووڵاتیی سووریادا دەبێت و مژدەیەکی خۆش دەبێت بۆ هەموو خەڵکی ئێمە لە سووریا.

 

 

مەحموود حەبیب: بە فەرمی یان بە ئاشکرا هیچ شتێک لەلایەن هێزەکانی سووریای دیموکراتەوە لەم بارەیەوە رانەگیێندراوە. پێشموانییە دۆخی سەرۆک ئەحمەد شەرع گەیشتبێتە ئەو رادەیەی پێویستی بە پاراستنی هێزەکانی سووریای دیموکرات بێت. خۆی هێزی تایبەتی هەیە کە دەتوانێت کۆشک بپارێزێت. بەڵام گەشتی سەربازی گەیشتوونەتە دیمەشق لەگەڵ ئەو شاندانەی بۆ دانوستاندن چوون و هەموومان ئەوەمان بینی. رەنگە ئەم بابەتە بە هەڵە لێکدرابێتەوە. بۆیە پێموانییە دۆخی دیمەشق گەیشتبێتە ئەم ئاستە.

 

 

مەحموود حەبیب: بەڵێ، لێدوانەکە پەلەی تێدا کرابوو و لە چوارچێوەیەکی جیاواز لەوەی کە دەبوو پیشان بدرێت وەرگیرابوو. ئەو قسانەی وەزارەتی ناوخۆ لەلایەن لایەنە پەیوەندیدارەکانەوە رەتکرانەوە، چ لەسەر ئاستی ناوخۆیی و چ لەسەر ئاستی هەرێمی و نێودەوڵەتی.

بۆیە بابەتی تەقاندنەوەی کەنیسەی مار ئیلیاس لە دیمەشق رەهەندێکی زۆر گەورەی وەرگرت و زۆر گرنگ بوو چاوەڕێی راستییەکان بکرێت. باشتر بوو وەزارەتی ناوخۆی سووریا خۆی لەو جۆرە ئاماژەدانە بەدوور بگرتایە بەرامبەر بە هێزەکانی سووریای دیموکرات.

هیچ کەسێکی عاقڵ باوەڕ ناکات کە هێزەکانی سووریای دیموکرات، کە 10 هەزار شەهیدیان داوە و زیاتر لە 10 ساڵە شەڕی رێکخراوەکە دەکەن، پەیوەندییان بە چەکدارانی رێکخراوەکەوە هەبێت یان پشتگیری لە ئۆپەراسیۆنەکانی بکەن. ئەمە بە تەواوی دژی لۆژیکە.

 

ئێمە لەگەڵ هاوبەشەکانمان لە هێزەکانی هاوپەیمانیی نێودەوڵەتی کاردەکەین کە چاودێریی هەموو رووداوەکانی ناوچەکە دەکەن. عەقیدەی شەڕکردنی ئێمە دژی چەکدارانی رێکخراوەکە و بیری تیرۆریستیی تووندڕەوی تاریکپەرستانەیە. لە هەمان کاتدا لەگەڵ هێزەکانی هاوپەیمانیی نێودەوڵەتی کاردەکەین کە چاودێریی هەموو جووڵەکان دەکەن. بۆیە ئەوەی وەزارەتی ناوخۆ باسی کرد، دوور بوو لە راستی و نالۆژیکی بوو، باشتر بوو پێش ئەوەی بەم شێوەیە قسە بکەن، کەمێک چاوەڕێیان بکردایە.

 

 

 

مەحموود حەبیب: کەمپی هۆل خێزانی چەکدارانی رێکخراوەکەی تێدایە. داواکارییەک لە حکومەتی دیمەشقەوە هەبوو، کە دەیانەوێت سەردانی ئەم کەمپە بکەن و ئێمەش وەڵامی داواکارییەکەمان دایەوە و ئەوانیش گەیشتن. پێشنیازیان کرد کە بە گەرەنتیی حکومەتی سووریا، هەندێک لە خێزانەکان بگەڕێنرێنەوە بۆ ماڵەکانیان و وەڵامی ئەم داواکارییەش درایەوە.

 

ئەوەی پەیوەندی بە کەمپی هۆلەوە هەیە، کێشەیەکی زۆر گەورە نییە. ئێمە داوا لەو وڵاتانە دەکەین کە هاووڵاتییان لە کەمپی هۆلدا هەیە، هاووڵاتییەکانیان ببەنەوە، لە سەرووی هەمووشیانەوە حکومەتی سووریا. بەڵام وەک گوتمان، دەبێت ئەم گەڕانەوەیە گەڕانەوەیەکی گونجاو بێت، واتە گەرەنتی هەبێت بۆ ئەوەی ئەم کەسانە نەگەڕێنەوە سەر کارە تیرۆریستییەکانیان.

بابەتێکی دیکە، دەبێت ناوەندی شیاندنەوە و هەوڵدان بۆ مێشک شتنەوەی ئەو منداڵ و خێزانانەی رێکخراوەکە هەبێت کە بیری رێکخراوەکەیان چۆتە ناخیانەوە. دەبێت ناوەندی شیاندنەوە هەبێت بۆ دەرهێنانیان لەو چوارچێوە رەش و تاریکە. بۆیە گەڕانەوەی خێزانەکان بۆ ماڵەکانیان لەسەر ئاستی ناوخۆی سووریا، پێویستی بە هەوڵێکی راستەقینە و گەرەنتیی ئەمنیی روون هەیە، تاوەکو جارێکی دیکە نەکەوینە نێو کێشەی دیکەوە لەگەڵ چەکدارانی نوێی داعش یان خێزانەکانی رێکخراوەکە.

 

لەبارەی باقی خێزانەکانی رەگەزنامەکانی دیکە، ئێمە داوا دەکەین هەموو وڵاتان هاووڵاتییەکانیان ببەنەوە. ئەم بابەتە پەیوەستە بەوەی کە ئێستا لەژێر سەرپەرشتیی هێزەکانی سووریای دیموکراتدا دەمێنێتەوە، تاوەکو وەک کەمێک لەمەوبەر گوتم، پڕۆسەی لێکتێگەیشتنەکان لەسەر هەموو ئەو دۆسیانەی ئێستا لە دیمەشق گفتوگۆیان لەسەر دەکرێت، پێدەگات.

 

 

مەحموود حەبیب:  لە راستیدا ئەگەر رفێندراوەکان لە ئیدلب یان حەلەب یان ئەو ناوچانە بن، کە لە دەرەوەی کۆنترۆڵی هێزەکانی سووریای دیموکراتن، ئەوا هاوئاهەنگی لەگەڵ لایەنی دیکەدا دەکرێت، رەنگە تورکیا، حکومەتی دیمەشق یان رژێمی پێشوو بێت.

بەڵام سەبارەت بە ناوچەی باکووری رۆژهەڵاتی سووریا، بێگومان هاوئاهەنگی لەگەڵ هێزەکانی سووریای دیموکراتدا دەبێت. ئەو حاڵەتانەی کە لێکۆڵینەوەمان لەسەر کردن و دۆزیماننەوە، لە کەمپی هۆل بوون. دوای گەڕان و لێکۆڵینەوە و لێپرسینەوەی زۆر، زانیمان کە ژنانی ئێزدیی رفێندراو لەنێو خێزانەکانی رێکخراوەکەدا بوون و توانیمان لە کەمپەکە بیانهێنینە دەرەوە.

کەواتە هەر گەڕانێک لە ناوچەی باکووری رۆژهەڵاتی سووریا بکرێت، بێگومان هێزەکانی سووریای دیموکرات تێیدا بەشدارن، بەڵام لە دەرەوەی ناوچەکانی ژێر کۆنترۆڵی ئێمە، لایەنی دیکە بەشداری لەم کارەدا دەکەن.

 

 

 

مەحموود حەبیب:  پێموانییە هیچ مووشەک یان درۆنێک کەوتبنە خوارەوە بۆ سەر بنکەکان. پێموایە تەنیا جارێک، یان درۆنێک یان مووشەکێک کە کرابووە ئامانج، پاشماوەکەی لە ناوچەیەکی نزیک کەوتە خوارەوە، نەک لەسەر بنکەکانی ئەمریکا، بەڵکو لە ناوچەیەکی نزیک لە بنکەکانی ئەمریکا. تەنیا ئەوە روویدا.

کەواتە هیچ ئامانجگرتنێکی راستەوخۆی بنکەکانی ئەمریکا لە باکووری رۆژهەڵاتی سووریا نەبووە. ئەگەر ئامانجگرتنێکی راستەوخۆش هەبووبێت، ئەوا مووشەکەکان پێش گەیشتنیان بەرپەرچ دراونەتەوە، بۆیە هیچ زیانێک بەو بنکانە نەگەیشتووە. بەڵێ، پێیان نەگەیشتووە.