رووداو دیجیتاڵ
بەرەبەیانی ئەمڕۆ هەینی لە قەزای کفری بەهۆی کێشەیەکی خێزانییەوە شەڕەتەقە لەنێوان خێزانێک دروستبوو و سێ برا برینداربوون، تەقەکەر و برینداری رووداوەکەش برای یەکدین.
بەپێی زانیارییەکانی رووداو، ناکۆکیی ئەو خێزانە لەنێوان چوار برادا بووە کە بەسەر دوو بەرەدا دابەشبوون، کاژێر دەوروبەری 02:00ـی بەیانی تەقەیان کردووە و سیانیان برینداربوون.
عەلی جەمال قەدووری، گوتەبێژی پۆلیسی گەرمیان بە تۆڕی میدیایی رووداوی راگەیاند، لە نەخۆشخانەی شەهید خالید گەرمیانی لە کفری چارەسەری پێویست بۆ بریندارەکان کراوە و دواتر رەوانەی نەخۆشخانەی کەلار کراون.
گوتەبێژی پۆلیسی گەرمیان ئاماژەی بەوەشکرد، پۆلیسی قەزای کفری چوونەتە شوێنی رووداوەکە، دەستیان بە لێکۆڵینەوە کردووە و بە بڕیاری دادوەر و بەپێی مادەی 405 / 31 فەرمانی دەستگیرکردن بۆ هەر چوار تۆمەتبار کە برای یەکدین، دەرچووە.
عەلی جەمال قەدووری ئاماژەی بەوەشکرد، سێ لە تۆمەتباران بە برینداری دەستگیرکراون و یەکێک لە بریندارەکان هەڵاتووە و پۆلیس لە هەوڵی دەستگیرکردنیدان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ