رووداو دیجیتاڵ
بەگوێرەی ئاماری رێکخراوی سی پی تی ئەمریکی، لە سەرەتای ئەم ساڵەوە تاوەکو کۆتایی مانگی رابردوو، سوپای تورکیا 404 جار هێرش و بۆردوومانی کردووەتە سەر هەرێمی کوردستان، کە زۆرترینیان لە سنووری پارێزگای هەولێر بووە، پاشان دهۆک و سلێمانی.
بەگوێرەی راگەیێندراوی رێکخراوی تیمەکانی دروستکەری ئاشتی کۆمەڵگە (CPT)ـی ئەمریکی، کە ئەمڕۆ پێنجشەممە بڵاوکراوەتەوە، "سوپای تورکیا لە مانگی ئاداردا، 118 هێرش و بۆردوومانی بۆ سەر هەرێمی کوردستان ئەنجامداوە".
کامەران عوسمان، ئەندامی تیمی کوردستانیی رێکخراوەکە بە تۆڕی میدیایی رووداوی گوت: "هێرشەکانی سوپای تورکیا لە مانگی ئاداردا، بەراورد بە مانگی کانوونی دووەم، 12% و بەراورد بە مانگی شووبات، 21% کەمیانکردووە".
لە راگەیێندراوەکەدا هاتووە: "لە هەفتەی یەکەمی دوای راگەیاندنی بانگەوازی ئاشتی، لەلایەن عەبدوڵڵا ئۆجەلان، رێبەری دەستگیرکراوی پەکەکە، رێژەی بۆردوومانەکان بەراورد بە دوایین هەفتەی پێش راگەیاندنی بانگەوازەکە، 145% زیادیکردووە".
بەگوێرەی ئاماری رێکخراوەکە، لە مانگی ئاداردا، سوپای تورکیا 55 هێرشی بۆ سەر سنووری پارێزگای هەولێر و 51 هێرشی بۆ سەر سنووری پارێزگای دهۆک و 12 هێرشیشی بۆ سەر سنووری پارێزگای سلێمانی کردووە.
کامەران عوسمان دەڵێت، لە مانگی ئاداردا سوپای تورکیا هیچ بۆردوومانێکی سنووری مەخموور و شنگالی نەکردووە.
رێکخراوی سی پی تیی ئەمریکی لە راپۆرتەکەیدا ئاماژەی بەوەشکردووە، لە سێ مانگی ئەم ساڵدا تورکیا 404 هێرش و بۆردوومانی بۆ سەر هەرێمی کوردستان کردووە و بەهۆیانەوە دوو هاونیشتمانی سڤیل شەهیدبوون و چواری دیکەش بریندار بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ