ژمارەی ماتۆڕە بێ سەرەتاکان لە سلێمانی زیادیکردووە

 

واحید سدیق، هاونیشتمانی کە پێشتر دوو ماتۆڕی لێ دزراوە و ئێستا ماتۆڕێکی دیکەی بە قەرز کڕیوە بە رووداوی گوت، "لە مانگی هەشتی 2022ـەوە ماتۆڕسکیلە سێ تاییەکەم دزراوە، هیچ سەرەتای نییە و ژمارەشم پێ نەدراوە، بۆیە تاوەکو ئێستا سکاڵاشم ئەنجامی نەبووە، هەر مانافێستێکم هەبووە، ئەو مانافێستەش لە حکومەتی هەرێمی کوردستان حسابی بۆ ناکرێت".

 

لە ساڵی 2012ـەوە بڕیاری پێدانی تابلۆ بە ماتۆڕسکیل راگیراوە و رێگە نادرێت بە فەرمی بهێندرێتە هەرێمی کوردستان، بۆیە بە شێوازی قاچاخ و نایاسایی و شێوازی جۆراوجۆر لە ناوچە سنوورییەکانەوە ماتۆڕەکان دەهێندرێن.

 

هەژار زیاتر لە 20 ساڵە کاری بازرگانیی ماتۆڕسکیل دەکات، پێنەدانی تابلۆ بە گرفتی گەورەی زیادبوونی ماتۆڕە بێ سەرەتاکان و هێنانی ماتۆڕ بە قاچاخ دەزانێت. 

 

هەژار عەلی، بازرگانی ماتۆڕسکیل بە رووداوی گوت: "ئێمە داوا دەکەین ماتۆڕسکیلەکان لە دەروازە سنوورییەکانی هەرێمی کوردستانەوە بە فەرمی داخڵ ببن، حکومەت باج لە هاوردەکردنیان وەربگرێت و بە پارەش ژمارەی کاتییان پێ بدرێت بۆ ئەوەی گرفتەکە چارەسەر بێت".

 

هاتووچۆی سلێمانی ئاماری ماتۆڕە تۆمارکراو و ناتۆمارکراوەکانی لانییە، بەڵام دەڵێت، لەپێناو پاراستنی خەڵک و ماتۆڕسوارەکانیش، وەزارەتی ناوخۆ مەرجی داناوە بۆ تۆمارکردنی ماتۆڕسکیل.

 

عەقید بەختیار محەممەد، بەڕێوبەری راگەیاندنی هاتووچۆی سلێمانی بە رووداوی راگەیاند: "بەپێی رێنماییەکانی وەزارەتی ناوخۆ، هەموو ساڵێک ماتۆڕسکیلی مۆدێلی ئەو ساڵە و دوو مۆدێل خوار خۆی ژمارەی دەدرێتێ، جگە لەوانە ژمارە نادرێت بە ماتۆڕی دیکە، دەبێت کوالێتیی ماتۆڕەکەش باش بێت لەپێناو پاراستنی خەڵک و شۆفێری ماتۆڕەکە، هەروەها ئاسانکارییەکی دیکەشمان بۆ کردوون ئەویش ئەوەیە کە پارەی ژینگەی ساڵانەی ماتۆڕسکیل کراوە بە تەنها پێنج هەزار دینار، ئەویش وەک ئاسانکارییەک بۆ شۆفێری ماتۆڕسکیلەکان".

 

بەهۆی نەبوونی تابلۆ و سەرەتای ماتۆڕسکیلەکانەوە، تاوەکو ئێستا نازانرێت چەند ماتۆڕسکیل لە هەرێمی کوردستان هەیە، بۆیە جگە لە گرفتی ئەمنی، گرفتی بۆ سەلامەتیی گیان و گیرفانی ماتۆڕسوارەکانیش دروستکردووە.