چەند تەنەکەیەکی زبڵ لە بەردەم چەند ماڵێک لە گەڕەکێکی هەولێر. وێنە: بڵند تاهیر - رووداو
رووداو دیجیتاڵ
پسپۆڕێکی ژینگە و ئاو دەڵێت، دانانی کارگەی ریسایکلین لە شارەکانی هەرێمی کوردستان پێویستە و دەبێت وەکو سەرچاوەی داهات و وزە چاو لە زبڵ بکرێت.
رۆژی شەممە، 04-02-2023، د. مەسعود حوسێن، پسپۆڕی ژینگە و ئاو میوانی بووڵتەنی نووڕۆژی تۆڕی میدیایی رووداو بوو کە جەعفەر موبەشیرنیا و هەوراز گوڵپی پێشکێشی دەکەن و تێیدا کاریگەرییەکانی زبڵ لەسەر ژینگە تاوتوێکرا.
د. مەسعود حوسێن دانانی کارگەی ریسایکلین بۆ کەڵک وەرگرتن لە زبڵ بە گرنگ دەزانێت و پێیوایە دەکرێت وەکو سەرچاوەی داهات و وزە کەڵک لە زبڵ وەربگیرێت و دەشڵێت، دەبێت کەرتی تایبەت لەم بەشەدا وەبەرهێنانی زیاتر بکات.
لە شاری هەولێر هەندێک لە زبڵەکە دەسووتێندرێت و هەندێکی دیکەش دەخرێتە ژێرخاک. بە بڕوای ئەو پسپۆڕەی ژینگە و ئاو، ''ئەوە چارەسەر نییە و ئەگەر لایەنە ئابوورییەکەی لەبەرچاو بگرین، پارەیەکی زۆر بەفیڕۆ دەدرێت و فڕێدانی زبڵ دەبێتە هۆی زیادبوونی بەکتریا و دەرچوونی چەند مادەیەکی مەترسیدار کە هۆکارن بۆ تووشبوون بە نەخۆشی".
زبڵی شاری هەولێر لە زبڵخانەی کانی قرژاڵە کۆدەکرێتەوە و لەو شوێنە دەسووتێنرێت، کۆمەڵگەی کانی قرژاڵەش نزیکەی دوو کیلۆمەتر لە زبڵخانەکەوە دوورە. د. مەسعود حوسێن پێیوایە هەڵکەوتەی زبڵخانەی کانی قڕژاڵە کاریگەری باشی هەیە، بۆ نموونە: "دەکەوێتە خوارووی جووڵەی با و دووکەڵ ناگەڕێتەوە بۆ شاری هەولێر؛ هەروەها جووڵەی ئاوی ژێرزەوی لە هەولێر، لە رۆژهەڵاتەوە بەرەو باشوورە و کانی قرژاڵەش دەکەوێتە باشووری رۆژئاوای ئەم شارە، بۆیە تەنیا کاریگەری لەسەر ئاوی خوارووی خۆی هەیە.''
بەڵام زبڵخانەکە بێ کاریگەری نییە و ئەو پسپۆڕە دەڵێت: ''بە توێژینەوە سەلماندوومانە زبڵخانەی کانی قرژاڵە کاریگەری لەسەر بیری چوار دەوری خۆی هەیە و پیسی دەکات.''
لە شاری هەولێر هەر تاکێک بە شێوەی تێکڕا رۆژانە 800 گرام بۆ سەرووی یەک کیلۆگرام زبڵ بەرهەم دەهێنێت. ئەو پسپۆڕەی ژینگە و ئاو باسی لەوە کرد، دەبێت لانیکەم نیوەی زبڵی هەرێمی کوردستان ریسایکڵ بکرێتەوە و کەڵکی لێوەرگیرێت.
مەسعود حوسێن دەڵێت، حکومەتی هەرێمی کوردستان بۆ بەرەنگاربوونەوەی پیسبوونی ژینگە دەبێ هەوڵی دابینکردنی چاڵی زبڵی زانستی بدات و هەروەها بۆ بنیادنانی زیاتری کارگەی ریسایکلین، کەرتی تایبەت هان بدات.
بەپێی ستانداردی جیهانیی سەوزایی، دەبێ زیاتر لە 25٪ـی ئەم شارە سەوزایی بێت و مەسعود حوسێن ئاماژەیدا ''لە هەولێر 11٪ تاوەکو 13٪ سەوزایی بەدی دەکرێت و دەبێ پەرەی پێبدرێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ