رووداو دیجیتاڵ
بەرەبەیانی ئەمڕۆ لە گوندێکی سنووری ئیدارەی سەربەخۆی سۆران، گورگێک پەلاماری دوو هاوژینی ئاژەڵداری دا و هەردووکیانی بریندار کرد؛ یەکێک لە بریندارەکان دەڵێت: "گورگەکە خەریک بوو هەردووکمان بکوژێت."
بەرەبەیانی ئەمڕۆ چوارشەممە، 13-05-2026 لە گوندی سیتکانی سنووری ئیدارەی سەربەخۆی سۆران، گورگێک چووەتە سەر ئاژەڵی هاونیشتمانییەک و دوای رووبەڕووبوونەوە، خاوەن ماڵ و هاوژینەکەی بریندار کردووە.
شێروان مەعروف، کە خۆی و هاوژینەکەی لە رووداوەکەدا بریندار بوون، بە رووداوی راگەیاند: "گورگەکە ویستی بچێتە نێو تەویلەی ئاژەڵەکانمان، کاتێک من و هاوژینەکەم گەیشتینە ئەوێ، راستەوخۆ پەلاماری هاوژینەکەمی دا و دەست و قاچی گەست، کاتێک ویستم لێی دووربخەمەوە، پەلاماری منیشی دا و هەردوو دەستمی بریندار کرد."
ئەو هاونیشتمانییە دەشڵێت: "گورگەکە زۆر دڕ بوو، بە جۆرێک پەلاماری داین نزیک بوو هەردووکمان بکوژێت."
سەبارەت بە دۆخی تەندروستییان، بەرەڤان سەباح، بەرپرسی بەشی فریاکەوتن لە نەخۆشخانەی ئاشتی لە سۆران بە رووداوی گوت: "دوو بریندارەکە گەیێندرانە نەخۆشخانە کە تەمەنیان لە نێوان 40 بۆ 50 ساڵیدایە. شوێنەواری گەستنی گورگ بە دەست و قاچیانەوە دیار بوو."
بەرەڤان سەباح ئاماژەی بەوەش کرد، چارەسەری پێویست بۆ هەردووکیان کراوە؛ پیاوەکە بەهۆی سووکیی برینەکەی رەوانەی ماڵەوە کراوەتەوە، بەڵام ژنەکە بەهۆی ئەوەی برینەکانی قووڵترن، لەژێر چاودێریی پزیشکیدا ماوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ