رووداو دیجیتاڵ
کۆمپانیای ئاسیاسێڵ لە راگەیێندراوێکدا رایگەیاند، پابەندن بە رێنماییە یاسایی و داراییەکانی حکومەتی عێراق و لەو چوارچێوەیەدا هەموو پابەندییەکانیان لە ساڵی 2025دا جێبەجێ کردووە.
راگەیێندراوەکە بە ناونیشانی "ئاسیاسێڵ پابەندبوونی تەواوەتی خۆی دووپات دەکاتەوە و سەرجەم پابەندبوونە یاسایی و داراییەکانی بەرامبەر بە حکومەتی عێراق جێبەجێ کردووە" بڵاوکراوەتەوە.
لە راگەیێندراوەکەدا هاتووە: "لەگەڵ کۆتاییهاتنی ساڵی 2025ـدا، ئاسیاسێڵ هەموو ئەو پابەندبوونە داراییانەی لە ئەستۆیدایە بەجێیهێناوە لە چوارچێوەی رێکارە بەرکار و پەسەندکراوەکان لەگەڵ لایەنە حکومییە پەیوەندیدارەکان، هەر وەکو ئەوەی لە هەموو ساڵە داراییەکاندا کردوویانە".
کۆمپانیاکە ئاماژەی بەوەکردووە: "ئێستا هیچ پابەندبوونێکی دارایی لە ئەستۆی کۆمپانیادا نییە بەرامبەر بە حکومەتی عێراقی، ئەمەش لە چوارچێوەی پابەندبوونی بەردەوامیدا بە شەفافیەت و دیسپیلینی دارایی و کارکردن بە گوێرەی رێکارە یاسایی و رێکخراوەییە کارپێکراوەکان".
وەک لە راگەیێندراوەکەدا هاتووە، "وەک هاوبەشێکی نیشتمانی بەرپرسیار، بەشداری دەکەین لە پشتیوانیکردنی ئابووریی نیشتمانی و بەهێزکردنی گەنجینەی دەوڵەت، بە جۆرێک مۆدێلێکی ئەرێنی کاری هاوبەشی تەندروست و درێژخایەن لە نێوان هەردوو کەرتی گشتی و تایبەتدا نیشانبدات".
ئاسیاسێڵ دابینکاری سەرەکی خزمەتگوزاریی پەیوەندییەکانی مۆبایل و خزمەتگوزارییە دیجیتاڵییەکانە لە عێراق و ژمارهی بهشدرابووانی نزیکەی 20 ملیۆنە؛ بە یەکەمین کۆمپانیای خزمەتگوزاریی مۆبایل ناسێندراوە لە عێراق و یەکەمین کۆمپانیاشە تۆڕەکەی هەموو بەشەکانی عێراق دابپۆشێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ