رووداو دیجیتاڵ
سەرپەرشتیاری ئیدارەی سەربەخۆی سۆران دەڵێت، "لەلایەن هەرێمی کوردستان و ئێرانیشەوە رەزامەندی لەسەر کردنەوەی دەروازەی کێلەشین لە سیدەکان دراوە. هەوڵەکان بۆ ئەوەیە ئەمساڵ کارکردن لە رێگەوبانەکانی تەواوبێت و بکرێتەوە." بەرپرسی پەیوەندییەکانی هەرێمی کوردستان و ئێرانیش دەڵێت، "تۆپەکە لە گۆڕەپانی ئێرانییەکانە و دەبێت کۆمپانیایەک دیاری بکەن بۆ چاککردنی رێگەوبانەکانی دەروازەکە."
رۆژی چوارشەممە، 06-09-2023، هەڵگورد شێخ نەجیب، سەرپەرشتیاری ئیدارەی سەربەخۆی سۆران لەبارەی کردنەوەی دەروازەی کێلەشین لە سنووری سیدەکان بە تۆڕی میدیایی رووداوی گوت، "لەلایەن حکومەتی هەرێمی کوردستان و کۆماری ئیسلامیی ئێرانیشەوە رەزامەندی لەسەر کردنەوەی دەروازەکە دراوە. ئێستا کار لەسەر میکانیزمی کردنەوەکە دەکەین و وەکو یەکەم قۆناخ کار لەسەر رێگەوبانەکەی دەکەین تاوەکو سەر سنوور."
سەرپەرشتیاری ئیدارەی سەربەخۆی سۆران دەڵێت، "لە بەشێکی رێگەوبانەکان دەست بە قیرتاوکردن کراوە و هەر گەیشتە سەر سنوور دەست بە کردنەوەی دەروازەکە دەکەین کە هەموو هەوڵەکانیش بۆ ئەوەیە ئەمساڵ بکرێتەوە."
بە گوتەی هەڵگورد شێخ نەجیب، دەوازەکە سەرەتا بۆ هاتووچۆی گەشتیاری دەکرێتەوە و دواتر بۆ هاتووچۆی بازرگانی و دەشڵێت، "کردنەوەی دەروازەکە بۆ گەشتیاری و بازرگانیش قۆناخ بە قۆناخ دەبێت."
عەبدوڵلا ئاکرەیی، بەرپرسی پەیوەندییەکانی ھەرێمی کوردستان و ئێران لە فەرمانگەی پەیوەندییەکانی دەرەوەی هەرێمی کوردستانیش بە رووداوی گوت، "وەزارەتی ناوخۆی ئێران، پارێزگاری ورمێ و قایمقامی شنۆش رەزامەندییان لەسەر کردنەوەی دەروازەکە داوە. ئێمەش داوامان کردووە کۆمپانیایەکی ئێرانی بێت و گرێبەست واژۆ بکەین بۆ ئەوەی دەست بە چاککردنی رێگەوبانەکانی دەروازە بکەن. ئێستا چاوەڕوانی ئێرانین بۆ ئەوەی کۆمپانیایەک بنێرن و تۆپەکە لە گۆڕەپانی ئەوان ماوەتەوە."
لەنێوان هەرێمی کوردستان و ئێران حەوت دەروازەی سنووری هەن؛ سێ فەرمی و چواریشیان نیمچە فەرمین؛ دەروازە فەرمییەکان هەریەک لە دەروازەی پەروێزخان لە سنووری ئیدارەی گەرمیان، حاجی ئۆمەران لە سنووری پارێزگای هەولێر و باشماخ لە سنووری پارێزگای سلێمانی پێکدێن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ