رێکخراوی جاسەنە: داخستنی رووداو لە رۆژئاوای کوردستان ناتەبایە لەگەڵ ئازادیی رۆژنامەگەری

 

لە راگەیێندراوەکەی رێکخراوی جاسەنەدا هاتووە، دوای چەندین جار رێگرتن و گوشار خستنەسەری، دواجار بەڕێوەبەرایەتیی خۆسەر كارەكانی تۆڕی میدیایی رووداوی لەسەرتاسەری رۆژئاوای کوردستان قەدەخەکرد؛ هەروەها هاتووە: "داخستنی تۆڕی میدیایی رووداو ناتەبایە لەگەڵ پرەنیسپی  ئازادیی رۆژنامەگەری لەو پارچەیەی كوردستان، كە خەڵكەكەی زیاترە لە سەدەیەك قوربانی نەبوونی ئازادی و دیموكراسییە؛ لە كاتێكدا بوونی فرەیی میدیایی لەهەر وڵاتێكدا كۆڵەكەیەكی سەرەكی هەر سیستمێكی دیموكراسییە".

 

رێکخراوی جاسەنە دەڵێت: "داخستنی رووداو لە رۆژئاوای كوردستان و میدیاكانی نزیك لە پارتی كرێكارانی كوردستان لە هەولێر و دهۆك، ئازاردان و فشارخستنە سەر رۆژنامەنووسان لەو دوو پارچەیەی كوردستان، نابێت تەنها لە چاوی میدیاییەوە تەماشابكرێت، بەڵكو هەموو ئەو هەنگاوانەی لە رۆژئاوای كوردستان بەرامبەر رووداو و میدیاكانی دیکە دەگیرێتەبەر، ئەو هەنگاوانەی بەرامبەر میدیاكانی نزیك لە پارتی كرێكارانی كوردستان و رۆژنامەنووسەكانی لە باشووری کوردستان دەگیرێتەبەر، ئەنجامی دۆخێكی سیاسی و میدیایی ناتەندروستە كە لە كوردستاندا گوزەر دەكات و زەرەرمەندی یەكەمیش هاووڵاتییە كە رێگری لێدەكرێت هەواڵ و زانیاریی جیاواز وەربگرێت‌ و هەروەها رۆژنامەنوسانی ئەو كەناڵانەش زەرەرمەندن كە كار و پیشەی ژیانیان لەدەستدەن".

 

رێکخراوی جاسانە دەڵێت، لە رۆژئاوای کوردستان و باشووری کوردستان میدیاكان و میدیاكاران دەبنە قوربانیی سیاسەت و پەیوەندیی نێوان هێز و كەسایەتییە سیاسییە ناكۆكەكانی پارچەكانی كوردستان.

 

لە بەردەوامیی راگەیێندراوی رێکخراوەکەدا هاتووە: "دۆخی میدیای كوردستان بەمشێوەیەی هەیە كە هەر خەریكی تۆمەتباركردنی یەكتریین، هەرگیز ناگاتە دۆخێكی تەندروست، كە فرەیی میدیا لە دایكبێت و ئازادی كاری میدیایی دەستەبەربێت، هەربۆیە تێڕوانینێكی گشتگیر لە دۆخی میدیادا لە هەردوو پارچەی كوردستان باشوور و رۆژئاوا، رەنگە یاریدەدەرێك بێت بۆ دۆزینەوەی رێگەچارەیەك، كە ئەویش ئێستا گەیشتنە بە میساقێكی گشتیی رۆژنامەنووسی لە نێوان رۆژنامەنووسانی باشوور و رۆژئاوای كوردستان، لە ئاییندەشدا رۆژنامەنووسانی پارچەكانی دیکەی كوردستان كە زەمینەی ئازادیی تەواو خۆش بكات بۆ كاری رۆژنامەگەری".

 

لە کۆتایی راگەیێندراوەکەدا، رێکخراوی جاسەنە رایدەگەیێنێت، "داخستنی رووداو و رێگەنەدان بە رووماڵ و دەستگیركردنی رۆژنامەنووسانی نزیك لە میدیاكانی پارتی كرێكارانی كوردستان، هەردووكیان پێشێلكارین و سرووشتی ئەو دەسەڵاتانە پێشاندەدەن كە حوكمی كوردستان دەكەن؛ هەربۆیە نزیكبوونەوەی میدیاكارانی كەناڵە جیاجیاكانی پارچەكانی كوردستان و پشتبەستن بە كاری پیشەیی رۆژنامەنووسی هەنگاوە راستەكە دەبێت بە ئاراستەی دابینكردنی ئازادی كاری میدیایی".

 

بە بڕیارێکی بەڕێوەبەرایەتیی خۆسەر، لە 5ی ئەم مانگەوە کارکردنی تۆڕی میدیایی رووداو لە رۆژئاوای کوردستان و ناوچەکانی دیکەی ژێر دەسەڵاتی هەسەدە قەدەخەکراوە.

 

لەبەرامبەر ئەو بڕیارەدا، تۆڕی میدیایی رووداو لە راگەیێندراوێکدا رۆژی 5ی مانگ رایگەیاند، "بڕیارەکەی بەڕێوەبەرایەتیی خۆسەر تاوانە. ئەم بڕیارە بڕیارێکی سیاسییە. رووداو بە شێوەیەکی پڕۆفیشناڵ و بەگوێرەی یاساکان لە هەموو شوێنێک کار دەکات. هیچ بنەمایەکی یاسایی بۆ ئەم بڕیارە نییە. رووداو کێشەکانی خەڵکی رۆژئاوای کوردستانی گواستووەتەوە و گەیاندوویەتیە بەرپرسانی رێڤەبەری  خۆسەر".