کۆمیسیۆن: هەفتەی داهاتوو خشتەی کارەکانی هەڵبژاردنی پەرلەمانی کوردستان رادەگەیێنین

 

رۆژی دووشەممە، 7-08-2023 عیماد جەمیل، سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق، لەبارەی ئامادەکارییەکانی تایبەت بە هەڵبژاردنی پەرلەمانی کوردستان بە تۆڕی میدیایی رووداوی راگەیاند: "کۆمیسیۆن پێش دەرچوونی مەرسوومی سەرۆکایەتی هەرێمی کوردستان بۆ دیاریکردنی رۆژی هەڵبژاردنی پەرلەمانی کوردستان، ئامادەکارییەکانی دەستپێکردبوو، بەڵام دوای مەرسوومی سەرۆکایەتی هەرێمی کوردستان کارەکانمان چڕدەبێتەوە و بڕیارە هەفتەی داهاتوو خشتەی کارەکانمان بۆ دەستپێکردنی هەنگاوە کردەییەکان رابگەیێنین."

 

عیماد جەمیل گوتی: "کردنەوەی دەرگای تۆمارکردنی هاوپەیمانێتییەکان و تۆمارکردنی بەربژێرەکان و رەفتارەکانی هەڵبژاردن و بانگەشە و چەندین کاری دیکە لەنێو خشتەکانمان بەپێی کات و وادەکان و وردەکارییەکانییانەوە دیاریدەکرێن."

 

گوتیشی: لەماوەکانی داهاتوودا دەست بە ئامادەکردنی بنکەکانی دەنگدان و ئامادەکردنی پێداویستی و کەرەستەکانی دەنگدان و رێکخستنی کۆگاکان و چەندین کاری دیکە بۆ بەڕێوەچوونی پەرلەمانی کوردستان دەکەن.

 

سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق، باسی لەوەشکرد کە ماوەی چەند رۆژێک دەبێت هەنگاوەکانیان بۆ نوێکردنەوەی تۆماری دەنگدەران و بایۆمەتری دەستپێکردووە و بەردەوام دەبێت و گوتی: "نزیکەی 80 هەزار کەس لەو ماوەیەدا لە پارێزگاکانی هەرێمی کوردستان تۆمارەکانیان نوێکردووەتەوە کە ئەوە ژمارەیەکی زۆر باشە و چاوەڕوانین زیاتریش ببێت."

 

26ى تەممووز، شاندێکی باڵای سەرۆکایەتیی هەرێمی کوردستان بەرنامەی زنجیرەیەک سەردانیان بۆ لای لایەنە سیاسییەکانی هەرێمی کوردستان دەستپێکرد.

 

دڵشاد شەهاب، گوتەبێژی سەرۆکایەتیی هەرێمی کوردستان رۆژی پێنجشەممە، 03-08-2023، لە کۆنفرانسێکی رۆژنامەڤانیدا رایگەیاند، نێچیرڤان بارزانی، سەرۆکی هەرێمی کوردستان رۆژی 25-02-2024ی وەکو رۆژی بەڕێوەچوونی هەڵبژاردنی پەرلەمانی کوردستان دیاریکرد، ئەوەش دوای راوێژ و گفتوگۆ لەگەڵ سەرجەم لایەنە سیاسییەکانی هەرێمی کوردستان.

 

رۆژی 09-10-2022 پەرلەمانی کوردستان بە دەنگی 80 پەرلەمانتار تەمەنی خولی پێنجەمی بۆ کۆتایی 2023 درێژکردەوە، رۆژی 30-05-2023 دادگەی فیدراڵیی عێراق رایگەیاند، درێژکردنەوەی تەمەنی پەرلەمانی کوردستان نادەستووری و نایاساییە و "هەر شتێک لە پەرلەمانی هەرێمی کوردستانی عێراق دەرچووە دوای ئەو ماوە یاساییە، لەڕووی دەستوورییەوە پووچەڵە."