رووداو دیجیتاڵ
ئیدریس نێچیرڤان بارزانی، سەردانی دکتۆر رەشاد میرانی کرد بەمەبەستی لە نزیکەوە پیرۆزبایی لێکردنی بەبۆنەی وەرگرتنی خەڵاتی نێودەوڵەتی (پووشکین) وەک یەکەمین کورد کە لە رووسیا ئەم خەڵاتەی بردووەتەوە.
لە سەردانەکەیدا ئیدریس نێچیرڤان بارزانی، دەستکەوتەکەی بە "گەورە و شانازی" بۆ هەموو کوردستانیان وەسفکرد و باسی ئەوەی کرد، "ئەم دەستکەوتانە نموونەیەکی راستەقینەن لە هەوڵی زانستی و لێکۆڵینەوەی بەردەوام کە ناسنامە، مێژوو و کولتووری کوردی زیاتر دەناسێنێت لە ئاستی نێودەوڵەتیدا."
خەڵاتی (پووشکین) یەکێکە لە بەرزترین خەڵاتە فەرمییەکانی رووسیا کە لەلایەن سەرۆککۆماری ئەو وڵاتەوە پێشکێشی کەسانی لێهاتوو دەکرێت کە بەشداری بەرچاو و کاریگەریان هەبێت لە بواری کولتوور، زانست، هونەر و پەرەپێدانی مرۆڤایەتی.
دکتۆر رەشاد میران، کۆمەڵناس و زانایەکی لێهاتووی بواری مرۆڤناسی کوردە کە لە 1952 لە شەقڵاوە لەدایکبووە. بڕوانامەی بەکالۆریۆسی لە زانکۆی بەغدا بەدەستهێناوە و ماستەر و دکتۆرای لە پسپۆڕی ئێتنۆگرافیا لە لێنینگراد (رووسیا)ی وەرگرتووە. لە ماوەی 28 ساڵدا (1993-2021) مامۆستا بووە لە بەشی کۆمەڵناسی لە کۆلێژی ئەدەبیاتی زانکۆی سەلاحەدین.
دکتۆر رەشاد میران، زیاتر لە 30 کتێب، توێژینەوەی زانستی و وەرگێڕانی بڵاوکردووەتەوە، ئەندامی دامەزرێنەری کۆمەڵەی کۆمەڵناسانی کوردستان و جێگری سەرۆکی ئەکادیمیای کوردی بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ